2024 yilda “Mening yo‘lim” dasturi doirasida 800 mlrd ajratiladi
“Endi qayerda ichki yo‘l qurish, qayerdagi yo‘llarni taʼmirlashni odamlarimizning o‘zi hal qiladi”, — deydi Prezident.
Prezident Shavkat Mirziyoyev huzurida yo‘l xo‘jaligini boshqarish, yo‘llarni loyihalash, qurish va saqlash tizimini isloh qilish yuzasidan yig‘ilish bo‘lib o‘tdi.
Unda bundan buyon ichki yo‘llarni qurish va taʼmirlash uchun byudjet mablag‘lari faqat “Mening yo‘lim” dasturi orqali ajratilishi belgilandi.
“Endi qayerda ichki yo‘l qurish, qayerdagi yo‘llarni taʼmirlashni odamlarimizning o‘zi hal qiladi.
Shunday qilsak, loyihani tanlab olishda va sifatni taʼminlashda ochiqlik bo‘ladi, to‘liq jamoatchilik nazorati o‘rnatiladi”, - dedi Prezident.
Ichki yo‘llarni qurish va taʼmirlash uchun 2024 yilda “Mening yo‘lim” dasturi doirasida 800 milliard so‘m ajratish topshirildi.
Xususiy sheriklik loyihalarini ishlab chiqishda yangidan tuzilayotgan jamg‘arma imkoniyatlaridan foydalanish zarurligi taʼkidlandi.
Bunda maxsus ishchi guruh yo‘l xo‘jaligi sohasida investitsiya va davlat-xususiy sheriklik metodologiyasi va mezonlarini ishlab chiqadi.
Viloyat hokimlari bilan birgalikda loyihalar tanlab olinadi va investorlarni jalb qilish uchun tayyorlanadi.
