2030 yilga kelib ichimlik suvi bilan taʼminlanganlik darajasi 90 foizga yetkaziladi
Yalpi majlisda aholini ichimlik suvi bilan taʼminlash xususida ko‘tarilgan masala hal etildi.
Hozirgi kunda respublikada 25,6 foiz aholiga ichimlik suv maxsus texnikalari yordamida tashib keltiriladi. Mavjud bo‘lgan 10 942 ta suv inshootining har beshtasidan bittasi, 89 ming km markaziy va ichki tarmoqlarning 26,5 foizi taʼmirtalab holatga kelib qolgan.
Senatning 36-yalpi majlisida Jizzax viloyati Zafarobod tumani “Birlik” va “Yorqin” mahallalari hududigacha diametri 450 mm. bo‘lgan, uzunligi 13,5 km ichimlik suv quvurlarini yangidan qurish uchun 7 mlrd so‘m ajratish orqali aholining ichimlik suvi taʼminotini yaxshilash masalasi senatorlar tomonidan ko‘tarilgan edi.
Ushbu masala yuzasidan Senatning Agrar va suv xo‘jaligi masalalari qo‘mitasi masʼul etib belgilanib, tegishli vazirlik va idoralar bilan hamkorlikda masalaga yechim topish yuzasidan ishlar olib borildi.
“O‘zsuvtaʼminot” AJ, Jizzax viloyati hokimligi ishchi guruh tuzib, “Fayz kommunal qurilish” MCHJ tomonidan 7,2 mlrd so‘mlik 15 km ichimlik suvi tizimlarini qurish ishlari amalga oshirildi. Natijada Zafarobod tumani “Yorqin” hamda “Birlik” mahallalari aholisi ichimlik suvi bilan taʼminlandi.
.webp)
Maʼlumotlarga ko‘ra, 2017-2023 yillar mobaynida jami 5 870 ta obyektda qurilish ishlari olib borilib, salkam 32 ming km ichimlik va oqova suv tarmoqlari qurilgan va rekonstruksiya qilingan. Ushbu ishlar natijasida 11,8 mln aholining ichimlik suv taʼminoti yaxshilanib, 6,6 mln aholi ilk bor ichimlik suv bilan taʼminlangan.
O‘zbekistonda 2030 yilga kelib markazlashgan ichimlik suv bilan taʼminlanganlik darajasini 90 foizga yetkazish reja qilinmoqda: 2023-2030-yillarda respublika bo‘yicha qariyb 50 ming kmdan ziyod ichimlik suv tarmoqlari hamda 2 000 dona inshoot qurish va rekonstruksiya qilish ko‘zda tutilgan. Ushbu ishlarga 28,5 trln so‘m (18 trln so‘mi xalqaro moliya institutlari ishtirokida) mablag‘ ajratiladi.
