“Hududgaz Buxoro” mansabdorlari 26 mlrdlik gazni o‘g‘irladi
Sud hukmiga ko‘ra, ularga ozodlikdan mahrum etish jazosi tayinlangan.
Energoresurslardan noqonuniy foydalangan “Hududgaz Buxoro” gaz taʼminot filiali xodimlariga sud hukmi o‘qildi. Bu haqda viloyat prokuraturasi xabar berdi.
Qayd etilishicha, Jinoyat ishlari bo‘yicha Kogon tuman sudi tomonidan sudlanuvchilar A.Jabborov, J.Sultonov, M.Hayitov va A.Abdullayevlarga oid jinoyat ishi ko‘rilgan. Sudlanuvchilar M.Hayitov va A.Abdullayevlar “Dildora” MCHJ rahbari A.Jabborov hamda “Osiyo Buxoro gaz” MCHJ rahbari J.Sultonov bilan til biriktirib energoresurslarini o‘g‘irlash jinoyatlarini sodir etishgan.
M.Hayitov 2022 yil 15 avgustdan “Hududgaz Buxoro” gaz taʼminot filiali metrologiya xizmati boshlig‘i vazifasida, A.Abdullayev metrologiya xizmati yetakchi muhandisi vazifasida ishlagan. Ular jamiyat rahbarlari A.Jabbarov va J.Sultonovlar bilan oldindan jinoiy til biriktirib, jamiyatga qarashli gaz quyish shoxobchalariga kelgan alohida tabiiy gaz quvurining ulanish nuqtasiga o‘rnatilgan “Avtopilot-PRO” rusumli gaz hisoblash uskunasi o‘rnatilgan xonaning eshigini tamg‘alanishini taʼminlamasdan, gaz hisoblagich uskunasidagi mavjud impuls trubkasi tamg‘asini gaz mahsulotlari quvurlarida o‘g‘irlik qilish maqsadida hech qanday hujjatsiz almashtirgan. Natijada “Hududgaztaʼminot” aksiyadorlik jamiyatining jami 26,1 mlrd so‘mlik juda ko‘p miqdordagi tabiiy gazi o‘g‘irlanib, yashirin ravishda talon-toroj qilingan.
Sud hukmiga ko‘ra, Jinoyat kodeksi 169-moddasi 4 -qismining “a” bandi, 209-moddasi 2-qismining “a” bandi, 228-moddasi 2-qismining “a,b” bandlari bilan aybli deb topilgan A.Jabborov, J.Sultonovlar 11 yil, A.Abdullayev va M.Hayitovlar 9 yilga ozodlikdan mahrum etildi.
Shuningdek, ayblanuvchilar tomonidan 6 mlrd so‘m zarar qoplanganligi sababli qolgan 20,1 mlrd so‘m zararni sudlanuvchilardan solidar tartibda undirilishi belgilandi.
