O'zbekistonga eng ko‘p gumanitar yordam bergan mamlakatlar nomi aniq bo‘ldi
Davlatga 6 oy ichida 23 davlatdan gumanitar yordam yuklari kirib kelgan.
O‘zbekistonga 2023-yil yanvar-iyun oylarida 23 ta davlatdan gumanitar yordam yuklari kirib keldi. Bu haqda 2023-yil birinchi yarim yilligidagi budjet ijrosi bo‘yicha Iqtisodiyot va moliya vazirligi taqdim etgan hisobotda ma’lum qilindi.
Unga ko‘ra, mamlakatga umumiy qiymati 123 314,8 ming dollar miqdorida gumanitar yordam yuklari kirib kelgan bo‘lib, uning asosiy salmog‘i Germaniya — 48 675,9 ming dollar (39,5 foiz), Xitoy — 27 259,8 ming dollar, (22,1 foiz) Amerika Qo‘shma Shtatlari — 17 074,1 ming AQSH dollar (13,8 foiz) davlatlariga to‘g‘ri keladi. Umumiy gumanitar yordamning 75,4 foizi yuqoridagi uch davlatga tegishli.
Kirib kelgan gumanitar yordam sohalar kesimida tahlil qilinganda, sog‘liqni saqlashga (94 151,8 ming dollar), ta’limga (27 366,8 ming dollar) va gaz ta’minoti korxonalariga suyultirilgan gaz uchun (1 651,6 ming dollar) hamda “Sharq ayoli” jamg‘armasiga (273,7 ming dollar) yo‘naltirilgan.
Kirib kelgan gumanitar yordamning 76,4 foizi sog‘liqni saqlash sohasiga to‘g‘ri keladi.
