"Taʼlim to‘g‘risida"gi qonunni takomillashtirish bo‘yicha ishchi guruh tuzildi
Guruh o‘z takliflarini 1 oy muddatda Qonunchilik palatasining Kengashiga taqdim etishi shart.
Qonunchilik palatasiga ko‘ra, 2020 yilda qabul qilingan qonunni “sohadagi islohotlar va bugungi kun talabidan kelib chiqib takomillashtirish” zarurati tug‘ilgan.
Qonunchilik palatasi Kengashining qarori bilan, “Taʼlim to‘g‘risida”gi qonunni takomillashtirish yuzasidan takliflar ishlab chiqish bo‘yicha ishchi guruh tuzildi.
Qarorda qonunni “sohada olib borilayotgan islohotlar va bugungi kun talabidan kelib chiqib takomillashtirish” zarurati borligi aytiladi.
Guruh o‘z takliflarini bir oylik muddatda, taʼlim to‘g‘risidagi milliy qonunchilikni va ilg‘or xorijiy davlatlar tajribasini o‘rgangan holda ishlab chiqishi va Qonunchilik palatasining Kengashiga taqdim etishi kerak.
28 nafar aʼzodan iborat ishchi guruhga palata spikeri Nurdinjon Ismoilov raislik qiladi. Guruhdan parlament vakillari, hukumat rasmiylari va boshqalar o‘rin olgan.
2023 yil aprel oyida Taʼlimni rivojlantirish respublika ilmiy-metodik markazi tashkil etilib, Maktabgacha va maktab taʼlimi vazirligining taʼlim mazmunini belgilovchi (taʼlim standartlari, o‘quv dasturlari va darsliklarga oid) qator vakolatlari shu markazga o‘tkazilgan edi. “Taʼlim to‘g‘risida”gi qonunda bu markaz taʼlim sohasidagi vakolatli davlat organlari qatorida aks etmagan. Qonun bundan 3 yil oldin – 2020 yil 24 sentyabrdan kuchga kirgan.
