Samarqanddagi bog‘chada ovqatga go‘sht o‘rniga suyak solingani aytilmoqda
Holat yuzasidan rasmiylar izoh berdi.
Ijtimoiy tarmoqlarda Samarqanddagi maktabgacha taʼlim muassasasida bolalar ovqatidan go‘sht kam chiqqani aks etgan video tarqaldi. Holatga viloyat Maktabgacha va maktab taʼlimi boshqarmasi holatga munosabat bildirdi.
Videoda Sanitariya-epidemiologik osoyishtalik va jamoat salomatligi qo‘mitasi viloyat boshqarmasi mutasaddilarining viloyatning Qo‘shrabot tumanidagi 5-maktabgacha taʼlim tashkiloti oshxonasini ko‘zdan kechirgani aks etgandi. Unda bolalar ovqatida solinishi kerak bo‘lgan go‘sht kam chiqqani tanqid qilingan.
Rasmiy munosabatda aytilishicha, boshqarma bolalarning haqqiga xiyonatni kechirib bo‘lmas holat deb hisoblaydi. Shu bois bu kabi holatlarning oldini olish maqsadida boshqarma xodimlaridan iborat ishchi guruhi ham joylarda muntazam o‘rganishlar olib boradi.
“Shu o‘rinda Sanitariya-epidemiologik osoyishtalik va jamoat salomatligi qo‘mitasi viloyat boshqarmasi ishchi guruhiga bog‘chalarda bolalar haqqiga qilinayotgan xiyonatni aniqlashdagi ko‘magi uchun viloyat Maktabgacha va maktab taʼlimi boshqarmasi minnatdorlik bildiradi.
Biroq SEO va JSQ viloyat mutasaddilarining o‘zlari qozonga mo‘ralayotganda sanitariya-gigiyena qoidalariga rioya etib, maxsus kiyim-boshlarda oshxonaga kirsalar, maqsadga muvofiq bo‘lar edi”, — deyiladi munosabatda.
Qayd etilishicha, boshqarma ishchi guruhi tomonidan aniqlangan kamchiliklar bo‘yicha mutasaddilarga choralar ko‘rish bo‘yicha hujjatlar tayyorlanmoqda. Holat yuzasidan masʼullarga ko‘rilgan choralar bo‘yicha batafsil maʼlumot beriladi.
