Qonunchilik palatasi Spikeri o‘rinbosarlari soni qisqartirilmoqda
Bunda Spikerning o‘rinbosarlari fraksiya aʼzosi bo‘lishi mumkin emasligi belgilanmoqda.
Oliy Majlis Qonunchilik palatasidagi «Milliy tiklanish» demokratik partiyasi fraksiyasi yig‘ilishida dastlab Prezidentimizning AQSHga tashrifi, BMT Bosh Assambleyasining 78-sessiyasida so‘zlagan nutqi, tadbir doirasida Markaziy Osiyo mamlakatlari va Amerika Qo‘shma Shtatlari yetakchilari sammitida ishtiroki, xorijiy davlatlar, nufuzli xalqaro tashkilotlar rahbarlari bilan o‘tkazgan uchrashuvlarining ahamiyati haqida batafsil to‘xtalib o‘tildi.
Mamlakatimiz xalqaro munosabatlarda faol tashqi siyosatni yo‘lga qo‘yayotgani va bu xalqaro hamjamiyat tomonidan chuqur eʼtirof etilayotgani taʼkidlandi. Davlatimiz rahbarining tarixiy nutqida ilgari surilgan taklif va tashabbuslardan kelib chiqib, partiya va uning fraksiyasi oldida turgan dolzarb vazifalar belgilab olindi.
Shundan so‘ng, deputatlar «O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida»gi qonun loyihasi muhokama qildilar.
Ushbu qonun loyihasi bilan Oliy Majlis palatalarining faoliyatini tartibga soluvchi qonunlarni yangi tahrirdagi Konstitutsiyaga muvofiqlashtirish, shuningdek, zamonaviy talablarga javob beradigan ixcham davlat boshqaruvini shakllantirish maqsadida ishlab chiqilgan bo‘lib, u bilan 13 ta qonun va 1 ta kodeksga tegishli o‘zgartirish va qo‘shimchalar kiritilmoqda.
Qonunchilik palatasi Spikeri o‘rinbosarlari soni 7 tadan 2 taga qisqartirilmoqda. Bunda Spikerning o‘rinbosarlari fraksiya aʼzosi bo‘lishi mumkin emasligi hamda lavozimda bo‘lish davrida siyosiy partiyadagi aʼzolikni to‘xtatib turishi belgilanmoqda.
Loyihadagi ushbu normalar fraksiya aʼzolarining qizg‘in munozaralariga sabab bo‘ldi. Ayrim deputatlarning fikricha, fraksiya rahbarlarining hozirda Spiker o‘rinbosarlari lavozimida faoliyat yuritishlari keyinchalik ham qoldirilishi kerak va bu masʼuliyatni taʼminlaydi.
Qonun tashabbuskorlarining qayd etishicha esa Spiker o‘rinbosarlarining fraksiya aʼzosi bo‘lishi mumkin emasligi, eng avvalo, ularning xolisligini taʼminlaydi, shu bilan birga, partiyalar, fraksiyalar mustaqilligini kafolatlab, ularning faoliyatini yana-da kuchaytirishga xizmat qiladi.
Muhokamalar davomida deputatlar qonun loyihasi yuzasidan o‘z fikr-mulohazalarini, takliflarini bildirdi. Loyihadagi ayrim normalar bo‘yicha turli savollar ko‘tarildi. Qizg‘in baxs-munozalardan so‘ng, qonun loyihasi fraksiya aʼzolari tomonidan qo‘llab-quvvatlandi.
Yig‘ilishda kun tartibiga kiritilgan boshqa masalalar ham muhokama qilinib, tegishli qarorlar qabul qilindi.
