Shavkat Mirziyoyev Germaniyadagi iqtisodiy forumda qatnashmoqda
Prezident navbatdagi uchrashuvni O‘zbekistonda o‘tkazishni taklif qildi.
Prezident Shavkat Mirziyoyev Germaniya iqtisodiyoti Sharqiy qo‘mitasi tomonidan tashkil etilgan iqtisodiy forumda ishtirok etmoqda.
Davlat rahbari “Markaziy Osiyo – Germaniya” iqtisodiy forumiga muntazam tus berib, navbatdagi uchrashuvni O‘zbekistonda, barcha mamlakatlarning ishbilarmon doiralari ishtirokida o‘tkazishni taklif qildi.
O‘zbekiston Prezidenti global miqyosdagi ishonch inqirozining jahon bozorlariga salbiy taʼsir ko‘rsatayotgan, muqobil savdo-logistika yo‘nalishlarini izlashga majbur qilayotgan oqibatlarini bugun mamlakatlar ham sezayotganini taʼkidladi.
Shu munosabat bilan ishtirokchilarning eʼtibori Markaziy Osiyodagi jarayonlarga qaratildi.
“Endilikda bu umuman boshqacha, kuchli va jips mintaqa. Mamlakatlarimiz birgalikda zamonaviy tahdidlarga samarali qarshi turmoqda, barqaror o‘sishni namoyish etmoqda”, - dedi Prezident.
Yevropa tiklanish va taraqqiyot banki ekspertlarining hisob-kitoblariga ko‘ra, yaqin yillarda yalpi mahsulotining jami o‘sishi besh foizdan ortiq darajada barqaror saqlanib qoladi.
Bir necha yil ichida mintaqa mamlakatlari ko‘plab jiddiy masalalarni hal etishga muvaffaq bo‘ldi - chegaralar ochildi, savdo va transport aloqalari, gumanitar almashinuvlar tiklandi.
“Biz avtomobilsozlik, energetika, elektrotexnika, to‘qimachilik, kimyo va farmatsevtika tarmoqlarida, qishloq xo‘jaligida muhim kooperatsiya loyihalarini amalga oshirmoqdamiz.
Chegaradosh hududlarda hamkorlik markazlari va tadbirkorlik tashabbuslarini moliyaviy qo‘llab-quvvatlash mexanizmlarini yaratmoqdamiz.
Shu tufayli xalqaro hamjamiyatning mintaqamizga qiziqishi kuchayib bormoqda. Bugun Berlindagi uchrashuvlar buning yorqin tasdig‘idir”, - dedi Shavkat Mirziyoyev.
