Bortida 265 nafar yo‘lovchi bo‘lgan Toshkent–Istanbul reysi bekor qilindi
“Uzbekistan airports” holat bo‘yicha maʼlumot berdi.
“Turk havo yo‘llari”ning THY-371 yo‘nalishi bo‘yicha Toshkent-Istanbul reysi texnik sabablarga ko‘ra bir necha soatga kechiktirildi. Bu haqda “Uzbekistan airports” xabar berdi.
Jadvalga ko‘ra, bortida 265 nafar yo‘lovchi bo‘lgan A-333 samolyoti Toshkent vaqti bilan 02:35 da havoga ko‘tarilishi kerak edi. Biroq samolyotda texnik nosozlik aniqlangani sababli parvoz kechiktirildi, yo‘lovchilar kutish zaliga joylashtirildi va issiq ovqat bilan taʼminlandi.
Ertalab aviakompaniya ushbu reysni bekor qilishga va yo‘lovchilarni boshqa reyslarda Istanbulga tashishga qaror qildi. Yo‘lovchilarga ovqatlanish va mehmonxonada joylashish ham taklif qilingan.
