Yetarli mukofot olmaslik yurakka zarar

 

So‘nggi tadqiqotlar ko‘p ishlash evaziga kam haq olish yurak kasalliklariga olib kelishini isbotladi. Bu holat xavfi semirish bilan bir xil darajada ekani aytilmoqda. Shuning uchun ishda sizga yetarli maosh to‘lanmayapti deb hisoblasangiz, maqolani oxirigacha o‘qing.

 

Tadqiqot natijalari Amerika kardiologiya assotsiatsiyasi tomonidan chop etiladigan Circulation: Cardiovascular Quality and Outcomes jurnalida chop etildi.

 

Maqola mualliflari ishdagi stress va mukofot o‘rtasidagi nomutanosiblik yurak-qon tomir kasalliklari xavfini ikki baravarga oshirishini aytmoqda.

 

"Insonlarning ishda o‘tkazadigan vaqti ancha ko‘pligini hisobga olsak, ishdagi stress omillari va yurak-qon tomir salomatligining chambarchas bog‘liqligiga amin bo‘lish mumkin. Bu esa jamiyat salomatligi va ishchi kuchi farovonligida muhim ahamiyatga ega. Tadqiqotimiz ishchilar va ish beruvchilar uchun manfaatli bo‘lgan mehnat sharoitini yaratish va stressli vaziyatlarga qarshi kurashish zarurligini taʼkidlaydi", - deydi tadqiqotning yetakchi muallifi Matilda Lavin-Robisho.

 

Birgina Yevropa qitʼasida erkaklar o‘limining eng katta qismiga yurak-qon tomir kasalliklari sabab bo‘ladi. Ayni paytda AQSHda yurak xuruji o‘limning asosiy sabablaridan biri sanaladi.

 

Tadqiqotchilar o‘rtacha yoshi 45 da bo‘lgan 6500 ishchi orasida kuzatuv o‘tkazgan. Tajriba 2000 yildan 2018 yilgacha davom etgan. Unda 3118 erkak va 3347 ayol qatnashdi.

 

Ishchilarning salomatligi haqidagi maʼlumotni o‘rgangach olimlar mehnat bosimi va mukofot puli o‘rtasidagi nomutanosiblikni baholadi.

 

Ishidagi stress va mukofot nomutanosib bo‘lgan erkaklarda yurak kasalliklari xavfi 49 foizga yuqori bo‘ladi.

 

Ishdagi stress omili yurakka semirish bilan bir xil taʼsir qilishi aytilmoqda. Ammo stressning ayollar salomatligiga taʼsiri yetarlicha isbotini topmagan.

 

Ish va maosh o‘rtasidagi nomutanosiblik ishchi kasbiga  ko‘p kuch sarflab, yetarli maosh yoki mukofot olmasligi natijasida yuzaga keladi.