Ilk bor fazoda chiqindi qoldirgan kompaniya jarimaga tortildi

 

AQSH Federal aloqa komissiyasi (FCC) EchoStar-7 sunʼiy yo‘ldoshini noto‘g‘ri ekspluatatsiya qilgani uchun Dish Network kompaniyasiga 150 ming dollar miqdorida jarima soldi. Kompaniya 2002 yildan beri koinotda bo‘lgan sunʼiy yo‘ldoshni "orbitadan to‘g‘ri tushirib yubora olmaganlikda" ayblangan.

 

FCC maʼlumotlariga ko‘ra, Dish kompaniyasi sunʼiy yo‘ldoshni ishlash muddati tugashi bilan orbitasini ko‘proq pasaytirib yuborgan, oqibatda "orbital chiqindi sifatida xavf tug‘dirishi" tahdidi yuzaga kelgan. Bunga sunʼiy yo‘ldoshda yoqilg‘i tugagani sabab qilib ko‘rsatilgan. Hozir qurilma "fazoviy chiqindiga" aylanib qolgan.

 

FCC Majburiy ijro byurosi rahbari Loyan Igalning taʼkidlashicha, bu odamlarning fazoni tez o‘zlashtirishi bilan bog‘liq qaror. Uning so‘zlariga ko‘ra, FCC fazoviy chiqindilar tarqalishiga qarshi agressiv kurashni davom ettiradi.

 

Jarima kompaniya faoliyatiga jiddiy zarar yetkazishi dargumon — Dish Network 2022 yilda 16,7 milliard dollar daromad olgan. Jarima ko‘proq “ogohlantirish” xususiyatiga ega ekani aytilmoqda.

 

Yevropa kosmik agentligi hisob-kitoblariga ko‘ra, Yer orbitasida 1 sm dan kichik bo‘lgan taxminan 128 million parcha, 1–10 sm o‘lchamdagi 900 ming va 10 sm dan kattaroq taxminan 34 ming bo‘lak bor. Ularning har biri fazoviy apparatlar bilan to‘qnashib, avariyaga sabab bo‘lishi mumkin. Kundalik xizmatlar uchun sunʼiy yo‘ldoshlarga qaramlik kuchayib borayotgani hisobga olinsa, bunday to‘qnashuvlar Yer uchun jiddiy oqibatlarga olib kelishi ham mumkin.