“Videoni ko‘rib, qattiq taʼsirlandim”
Zoir Mirzayev televizorda eriga murojaat qilib, qizining to‘yida duo berishini so‘ragan ayolga to‘yona yubordi.
Toshkent viloyati hokimi Zoir Mirzayev ajrashib ketgan turmush o‘rtog‘idan qizining to‘yida ko‘rinish berib, duo qilishini so‘ragan ayolga to‘yona ulashdi.
"Ijtimoiy tarmoqlarda tarqalgan bu video er-xotin o‘rtasidagi ajrimlar va oilaviy nizolarning oldini olish qanchalar muqaddas vazifa ekanligiga eʼtibor qaratadi. Bugun paxta hosilining yig‘im-terimi mavsumi avjida. Zamira opa ham shu insonlar qatorida O‘rta Chirchiq tumaniga kelib, terimda ishtirok etayotgan ekan.
Videoni ko‘rib, sizning yuragingizdan qanday tug‘yonlar kechgan bo‘lsa, men ham shunday qattiq taʼsirlandim. Izlab ko‘rsak, O‘rta Chirchiqqa Surxondaryodan kelib, terimda faol qatnashayotgan Zamira opa Shaymanova ekan.
Afsuski, Zamira opaning oilasi uch yil burun darz ketgan. Eri uydan chiqib ketgani bo‘yicha qaytmagan. Yilda bir-ikki marta qishloqqa kelib, ko‘chada o‘g‘illarini ko‘rib, qaytib ketar, bundan qizining dili qattiq og‘rir ekan. Yaqinda to‘y. Qizning ko‘zlari esa otasining yo‘liga mushtoq.
Umid qilamanki, bu voqea o‘sha insonga ham saboq bo‘ladi va oilasi bag‘riga qaytadi. Biz bu holatni nazoratga oldik, xotin-qizlar va oila institutlari orqali qo‘limizdan kelgan barcha ishni qilamiz.
Eng katta niyatim — er-xotin birgalikda qiz uzatib, elga to‘y berishganida biz ham xizmat qilib, uylarida mehmon bo‘lib, yoshlarga baxt tilashimiz nasib qilsin. Ishonamanki, xuddi shunday bo‘ladi, biz shunga harakat qilamiz.
Insonni qadrlash, unga hurmat-izzat ko‘rsatish, qiynalgan paytlarida yonida turib, yordam ko‘rsatish bugun davlat siyosatidir. Biz xalqimiz kutgan mana shu buyuk siyosatning oddiy bir ijrochisimiz, xolos", — deydi Toshkent viloyati hokimi.
Toshkent viloyati hokimining vakili sifatida Zamira opa bilan ko‘rishgan O‘rta Chirchiq tumani hokimi Ixtiyor Qosimov to‘yona Surxondaryo viloyatigacha olib borib berilishini maʼlum qilgan.
