Biz nega qariymiz?

 

O‘tkazilgan so‘nggi tadqiqotlar natijalari shuni ko‘rsatadiki, organizmda yomon bakteriyalarning ko‘payishi qarish va jismoniy holat yomonlashishiga olib keladi.

 

Inson ichaklari murakkab ekotizim bo‘lib, unda milliardlab mikroorganizmlar yashaydi. Ular esa o‘z navbatida salomatligimiz uchun javob beradi.

 

Developmental Cognitive Neuroscience jurnalida chop etilgan xulosalarga ko‘ra, ichaklardagi mikroorganizmlar xilmaxilligi nafaqat jismoniy holatga, balki qarish tezligiga ham taʼsir qiladi. Tajriba Vengriya sport fanlari universiteti tomonidan o‘tkazilgan.

 

Uning yetakchi muallifi, professor Jolt Radakning so‘zlariga ko‘ra, bu sinov probiotiklardan salomatlik va uzoq umr ko‘rishda foydalanishning yangi imkoniyatlarini ochadi.

 

U o‘z jamoasi bilan ichak mikroflorasi hamda insonning biologik yoshi o‘rtasidagi aloqani tadqiq qildi. Tajribada 80 nafar havaskor eshkakchilar qatnashgan. Tadqiqot doirasida har bir qatnashchi epigenetik markerlar sinovidan o‘tgan.

 

Epigenetik marker - o‘ziga xos DNK o‘tkazuvchisi bo‘lib, u organizm hujayralarining rivojlanishi va atrof-muhitga reaksiyasida muhim rol o‘ynaydi.

 

Hujayralar sifatiga hayot tarzi, oziqlanish, atrof-muhit taʼsiri kabi bir necha omil taʼsir qiladi. Oxir-oqibatda bu salomatlik holati va qarishga o‘z taʼsirini o‘tkazadi.

 

Olimlar yallig‘lanish jarayonini chaqiruvchi bakteriyalar qarishni tezlashtirishini aniqladi.

 

Tez qarish esa siz biologik yoshingizdan katta ekaningizni bildiradi. Tajriba qatnashchilari orasida biologik yoshi meʼyorda bo‘lganlar ichagida foydali bakteriyalar ko‘p ekani aniqlangan. Aksincha hollarda esa qatnashchi fitnes-sinovlarda past natija ko‘rsatgan.

 

Olingan natijalar ichak bakteriyalari va salomatlik o‘rtasidagi uzviy bog‘liqlikni ko‘rsatib berdi. Sog‘lom ovqatlanish esa foydali bakteriyalar ko‘payishiga sababdir.

 

Ayni paytda olimlar guruhi takroriy tajriba o‘tkazishni rejalashtirmoqda. Yakuniy xulosalar 2024 yilda eʼlon qilinishi kutilmoqda.