Andijon davlat universitetida qariyb 40 milliard so‘m naqd pul talon-taroj qilingan
Aniqlangan noqonuniy o‘zlashtirilgan mablag‘lardan 5,1 milliard so‘mi undirilishi taʼminlandi.
Hisob palatasining yagona “Masofaviy nazorat” markazi tahlillari asosida aniqlashicha, Andijon davlat universitetida jami 39,3 milliard so‘m naqd pul mablag‘lari talon-taroj qilingan. Jumladan:
➖kontrakt mablag‘lari hisobidan stipendiyasiz shaklda tahsil olgan 8 761 nafar talabaga 25,1 milliard so‘m ortiqcha stipendiya hisoblanib, to‘lov qaydnomalari soxtalashtirilgan;
➖talabalar tomonidan to‘langan 9,3 milliard so‘m to‘lov-kontrakt summalari universitet hisob raqamiga kirim qilinmagan;
➖talabalarga hisoblangan 2,7 milliard so‘m rag‘batlantirish mablag‘lari tarqatilmasdan, ularning imzolari soxtalashtirilgan;
➖byudjet mablag‘lari hisobidan 2 226 nafar talabaga bitta davr uchun ikki martadan 1,1 milliard so‘m ortiqcha hisoblangan stipendiya o‘zlashtirilgan;
➖talabalar yotoqxona ijarasidan tushgan 911,8 million so‘mlik naqd pullar universitet hisob raqamiga kirim qilinmasdan noqonuniy o‘zlashtirilgan.
➖universitetga xizmat uyi xarid qilish uchun jismoniy shaxs bilan 2,5 milliard so‘mlik to‘g‘ridan-to‘g‘ri shartnoma tuzib, shundan 300 million so‘mi noto‘g‘ri o‘tkazilgan.
Aniqlangan noqonuniy o‘zlashtirilgan mablag‘lardan 5,1 milliard so‘mi undirilishi taʼminlandi. Tekshirish yakuni bilan rasmiylashtirilgan hujjatlar to‘plami huquqiy baho berish uchun huquqni muhofaza qiluvchi organlarga yuborildi.
