Endi hokimlar har oy yirik madaniy tadbir o‘tkazadi
Tadbirlar Madaniyat vazirligi bilan birgalikda amalga oshiriladi.
Prezident Shavkat Mirziyoyev raisligida turizm va madaniyat maskanlari imkoniyatlarini to‘liq ishga solish hamda "Yashil makon" kuzgi mavsumini samarali tashkil etish yuzasidan videoselektor yig‘ilishi bo‘lib o‘tmoqda.
Yig‘ilishda madaniy tadbirlarni ko‘paytirish turistlarni jalb qilishda katta imkoniyat ekani taʼkidlandi.
Bunday tadbirlar Buxoro, Navoiy, Namangan, Farg‘ona, xorazm, Toshkent viloyatlarida ko‘p o‘tkazilayotgani, lekin Sirdaryo, Jizzax, Surxondaryo viloyatlarida bu boradagi ishlar qoniqarsiz ekani aytildi.
Viloyatlar hokimlari Madaniyat vazirligi bilan birgalikda har oy yirik madaniy tadbir o‘tkazishi shartligi ko‘rsatib o‘tildi.
Tuman va shaharlarda ko‘p sayilgoh, xiyobon, istirohat bog‘lari, teatr va madaniyat uylari bo‘sh turgani, na turistlarni, na aholimizni o‘ziga jalb qila olayotgani qayd etildi.
Hududlar rahbarlariga bu joylarda musiqiy, ko‘ngilochar va maʼrifiy tadbirlarni muntazam tashkil etib borishga topshiriq berildi.
