O‘zbekistonning Isroildagi Elchixonasi murojaat bilan chiqdi
Bu Isroil — HAMAS mojarosida 5 nafar o‘zbekistonlik halok bo‘lgani haqidagi xabarlar bilan bog‘liq.
So‘nggi kunlarda O‘zbekiston ommaviy axborot vositalari va ijtimoiy tarmoqlarda Isroil-HAMAS qarama-qarshiligini yoritish jarayonida O‘zbekiston fuqarolari halok bo‘lganligi haqida maʼlumotlar chop etilmoqda.
"Isroil Tashqi ishlar vazirligi va politsiyasi bergan maʼlumotga ko‘ra, mamlakat janubida ro‘y bergan terror hujumi vaqtida O‘zbekistonda tug‘ilgan va 90-yillarda repatriatsiya dasturiga muvofiq Isroilga ko‘chib kelgan 5 (besh) nafar kishi halok bo‘lgan. Olingan maʼlumotlarga ko‘ra, ular amaldagi O‘zbekiston fuqarolik pasportlariga ega emas.
Yuqoridagilarni eʼtiborga olib, OAVni kuzatib boruvchi fuqarolarda bo‘lib o‘tayotgan voqealar ko‘lami va urush harakatlari haqida noto‘g‘ri qarashlar paydo bo‘lishini oldini olish maqsadida maʼlumotlarni chop ettirishdan oldin, ularni ishonchli manbalardan, shu jumladan, O‘zbekiston Respublikasining Isroildagi Elchixonasi orqali qayta tekshirishingizni so‘raymiz", — deyiladi xabarda.
