O‘zbekiston TIV: Bu xalqaro gumanitar huquqning qo‘pol buzilishi

 

Tashqi ishlar vazirligi G‘azo sektoridagi “Al-Ahli” kasalxonasiga uyushtirilgan havo hujumi bo‘yicha munosabat bildirdi.

 

"G‘azo sektoridagi “Al-Ahli” kasalxonasiga uyushtirilgan havo hujumi oqibatida ko‘plab insonlar halok bo‘lgani haqidagi xabarni chuqur qayg‘u bilan qabul qildik.

 

Bu dahshatli zo‘ravonlik harakatini keskin qoralaymiz va buni xalqaro gumanitar huquqning qo‘pol buzilishi deb hisoblaymiz.

 

Vafot etganlarning oila aʼzolari va yaqinlariga chuqur hamdardlik bildirgan holda, mojaro tomonlarini zudlik bilan harbiy harakatlarni to‘xtatishga hamda o‘t ochishdan tiyilishga chaqiramiz", — deyiladi bayonotda.

 

Eslatib o‘tamiz, G‘azo sektoridagi “Al-Ahliy al-Maʼdaniy” baptistlar shifoxonasiga Isroil tomonidan raketa zarbasi berildi. So‘nggi maʼlumotlarga ko‘ra, 800 nafardan ziyod odam halok bo‘lgan, ularning orasida yuzlab bolalar bor.

 

G‘azo sog‘liqni saqlash vazirligi shifoxonada halok bo‘lganlarning barchasi tinch aholi vakillari bo‘lganini qayd etdi.

 

Isroil tomoni zarba uchun javobgarlikni o‘z zimmasiga olmayapti.

 

Falastin prezidenti Mahmud Abbos shifoxonada halok bo‘lgan qurbonlar xotirasiga mamlakatda uch kunlik motam eʼlon qildi.