Toshkentda mushuklar uchun “mehmonxona” ochildi
U ko‘ngillilar tashabbusi va mahalla aholisining roziligi bilan qurilgan.
Poytaxtning Uchtepa tumanida joylashgan “Vatan” mahallasida mushuklar uchun maxsus “mehmonxona” tashkil etildi, deya xabar bermoqda Toshkent shahar hokimligi matbuot xizmati.
Ta’kidlanishicha, mazkur “mehmonxona” ko‘ngillilar tashabbusi va mahalla aholisining roziligi bilan qurilgan. “O‘ziga xos „mehmonxona“ ko‘cha mushuklari uchun issiqqina boshpana vazifasini bajarib, yaqinlashib kelayotgan qish kunlarida joniga oro kiradi”, - deyiladi xabarda.
Mushuklar mehmonxonasi “Mushukkent” loyihasi va Toshkent shahar IIBB himoyasida bo‘lib, mahallada yashovchi bolalarni jonivorlarga mehrli bo‘lishga o‘rgatadi, - deya qayd etdi loyiha tashabbuskorlari.
“Mushukkent” loyihasida yozilishicha, boshpana xarajatlarini Go‘zal ismli ko‘ngilli o‘z bo‘yniga olgan. Endi u yerga kuzatuv kamerasini o‘rnatish haqida o‘ylanmoqda.
