AQSH O‘zbekiston madaniy merosi uchun 1 million dollar ajratdi
Ushbu mablag‘ madaniy meros obyektlarini himoya qilish va qayta tiklash uchun sarflanadi.
O‘zbekiston va AQSH hukumatlari o‘rtasida “O‘zbekistonning arxeologik va etnologik materiallari toifalarida import cheklovlarini joriy etish to‘g‘risidagi Bitim” imzolandi. Ikki tomonlama Bitimni Madaniy meros agentligi direktori Bahodir Abdikarimov va AQSHning O‘zbekistondagi Favqulodda va muxtor elchisi Jonatan Henik imzoladi.
"Ushbu kelishuv O‘zbekiston va AQSH o‘rtasida muzey ashyolari va madaniy boyliklarning noqonuniy aylanishining oldini olish va qaytarish bo‘yicha hamkorlikni rivojlantirish uchun asos bo‘lib xizmat qiladi. Bitim arxeologik va etnologik materiallarni talon-toroj qilishning oldini olish va maxsus ro‘yxatga kiritilgan obyektlarni olib kirishga cheklovlarni belgilaydi. Shuningdek, ushbu yo‘nalishda mutaxassislar tayyorlash va malakasini oshirish taʼminlanadi hamda ikki mamlakat o‘rtasida moddiy madaniy merosni targ‘ib qilishga qaratilgan qo‘shma ko‘rgazmalar o‘tkazishga zamin yaratadi", — deydi Bahodir Abdikarimov.
"Bugun tarixiy kun. Chunki O‘zbekiston Markaziy Osiyoda AQSH bilan madaniy boyliklar to‘g‘risidagi bitimni imzolagan birinchi davlat bo‘ldi. AQSH O‘zbekistondan tashqari dunyoning yana 25 ta mamlakati bilan shu kabi shartnomalar tuzgan. Madaniy meros, sanʼat va sanʼat asarlarini muhofaza qilish oson ish emas. Shuning uchun ham ushbu kelishuv bugungi kunda juda muhim qadamdir. O‘zbekistondagi madaniy meros obyektlarini himoya qilish va qayta tiklash uchun AQSH hukumati 1 million dollar ajratdi. Biz O‘zbekistondagi madaniy merosni himoya qilish va uning boy tarixini dunyoga namoyish etish borasidagi saʼy-harakatlarga hamkorlik qilish istagidamiz", — dedi Jonatan Henik.
