Ayrim temir yo‘l vokzallari tadbirkorlarga ijaraga beriladi
Bu haqda "O‘ztemiryo‘lyo‘lovchi" AJ matbuot xizmati ma’lum qildi.
Joriy yil 10-oktabr kuni qabul qilingan "O‘zbekiston Respublikasi temir yo‘l transporti sohasini tubdan isloh qilish to‘g‘risida"gi Prezident qarori ijrosini ta’minlash maqsadida noyabr oyidan boshlab, "O‘zbekiston temir yo‘llari" AJ tomonidan Toshkent-Markaziy, Samarqand va Qo‘qon temir yo‘l vokzallari, ularda joylashgan bo‘sh hududlarni tadbirkorlarga davlat-xususiy sherikchilik hamda shartnoma asosida ijaraga beriladi.
Jumladan, Toshkent-Markaziy temir yo‘l vokzalida tadbirkorlar uchun 4 ming kv.m joy bo‘lib, tadbirkorlar ofis uchun joy, mehmonxona, do‘kon, xizmat ko‘rsatish shoxobchalari hamda savdo markazlari tashkil qilishlari mumkin.
Vazirlar Mahkamasining qaroriga asosan, temir yo‘l vokzallaridagi bo‘sh hududlarni ijaraga olmoqchi bo‘lgan tadbirkorning taklifi o‘rganilib, tanlangan joy "E-auksion" platformasi orqali ijaraga beriladi.
Kompaniya tadbirkorlardan qo‘shimicha ma’lumot olish uchun Jamiyat ma’muriyati bilan bog‘lanishni so‘ramoqda.
