So‘nggi 10 kunda energetika sohasida davlatga 14 mlrd zarar yetkazildi
Joylarda gaz va elektr energiyasidan noqonuniy foydalanish holatlari aniqlanmoqda.
So‘nggi 10 kunda ayrim isteʼmolchilarning elektr energiyasi va tabiiy gazdan noqonuniy foydalanishlari natijasida davlat manfaatlariga 14 mlrd 898 mln so‘mlik zarar yetkazilgan. Bu haqda Energetika vazirligi maʼlum qildi.
Energetika vazirligi huzuridagi «O‘zenergoinspeksiya», Bosh prokuratura, tegishli huquqni muhofaza qiluvchi organlar, elektr hamda gaz taʼminoti korxonalari mutaxassislari bilan hamkorlikda noyabr oyida o‘tkazilgan nazorat tadbirlarida 1 ming 185 ta holatda isteʼmolchilarning tabiiy gaz va elektr energiyasidan noqonuniy foydalanganliklari aniqlandi.
Bunda 11 mlrd 338 mln so‘mlik elektr energiyasi va 3 mlrd 560 mln so‘mlik tabiiy gaz talon-toroj qilinishi natijasida davlat manfaatlariga keltirilgan jami 14 mlrd 898 mln so‘mlik zarar undirishga qaratildi.
Noqonuniy foydalanish holatlarining eng ko‘pi — Samarqand, Farg‘ona va Andijon viloyatlari hissasiga to‘g‘ri keladi.
Qoidabuzar isteʼmolchilarga nisbatan belgilangan tartibda choralar ko‘rilib, tegishli hujjatlar huquqni muhofaza etuvchi organlarga taqdim qilindi.
