Andijonlik o‘qituvchi o‘z maoshidan o‘quvchilarga stipendiya tarqatdi

 

Andijon viloyati Marhamat tumanidagi 6-umumtaʼlim maktabida 30 yildan buyon rus tili va adabiyoti fanidan o‘quvchilarga saboq berib kelayotgan Yorqinoy Mamatisaqova o‘quvchilarini ruhlantirishning o‘zgacha usulini qo‘lladi.

 

Doim o‘z ustida ishlab, o‘quvchilarini o‘qishga bo‘lgan motivatsiyasini oshirish yo‘lida izlanadigan o‘qituvchi internetda xorijlik pedagoglar tomonidan yo‘lga qo‘yilgan yaxshi tajribadan xabar topdi va bu tajribani o‘zi sinf rahbarlik qilayotgan 10-"B" sinfida qo‘llab ko‘rishni o‘z oldiga maqsad qilib qo‘ydi.

 

 

Fidoyi pedagog 1-chorak yakuni bo‘yicha 4 nafar aʼlochi o‘quvchini aniqlab, ularga "Ustoz stipendiyasi" berishni yo‘lga qo‘ydi. Eʼtiborlisi, mazkur stipendiyani sinf rahbarligi uchun to‘lanayotgan maoshidan ajratdi. Yana 12 nafar aʼlochi o‘quvchilarini taqdirlab, kelgusida boshqa o‘quvchilarning ham yaxshi o‘qishi uchun motivatsiya bera boshladi.

 

"II chorakdan stipendiya olish uchun ko‘p o‘quvchilarim harakat qilmoqchi. Bir oyda sinf rahbarlik uchun oladigan maoshim o‘quvilarimga ketsa ham ularni rag‘batlantirishdan zavqlanaman. Boisi, bu stipendiyani joriy qilganimdan so‘ng o‘quvchilarimning ota-onasi qo‘ng‘iroq qilib, rahmat aytishdi. Farzandi uyga pul solingan konvertni ochmay olib borib, ota-onasiga berganini quvonch bilan gapirishdi. Oila davrasida ochilgan konvertni uy to‘riga qo‘yib qo‘yishibdi. O‘quvchilarim ko‘zidagi quvonch menga u olayotgan maoshimdan ko‘ra ko‘proq huzur berdi", — deydi o‘qituvchi.