53 yoshli TikTok yulduzi, musiqachi va teleboshlovchi... — Argentinaning yangi prezidenti haqida nimalar maʼlum?
Zamon.uz Xaver Miley haqida maʼlumotlarni bir nuqtaga jamladi.
Argentinada o‘ng qanot "Ozodlik kelyapti" alyansi bir qismi bo‘lgan Libertarlar partiyasiga rahbarlik qiluvchi Xaver Miley prezidentlik saylovlarida g‘alaba qozondi.
Dastlabki natijalarga ko‘ra, u 56 foizga yaqin ovoz to‘plagan. 20 noyabr, dushanbaga o‘tar kechasi Mileyni saylovlardagi g‘alabasi bilan uning raqibi, «Vatan uchun ittifoq» hukmron koalitsiyasidan nomzod bo‘lgan Argentina iqtisodiyot vaziri Serxio Massa hamda bir qator Lotin Amerikasi davlatlari yetakchilari tabrikladi.
"Men Xaver Miley bilan bog‘lanib, uni tabrikladim va omad tiladim, chunki u argentinaliklarning ko‘pchiligi keyingi to‘rt yilga tanlagan prezident", — dedi Serxio Massa ovoz berishning rasmiy natijalari eʼlon qilinishidan oldin.
Mileyning ulkan vaʼdalari
53 yoshli TikTok yulduzi, musiqachi, iqtisodchi va teleboshlovchi o‘zining g‘alati uslubi va munozarali bayonotlari tufayli AQSHning sobiq prezidenti Donald Tramp va Braziliyaning sobiq prezidenti Jair Bolsonaro bilan taqqoslanadi. Xususan, u AQSH dollari uchun “kasal pesodan voz kechishga" chaqirgan va "inflyatsiya saratoni"ni tugatish uchun Markaziy bankni yoqib yuborishga vaʼda bergan.
AFPʼning eslashicha, Miley abortga, o‘qotar qurol olib yurishga qarshi chiqqan, Argentinaning asosiy savdo hamkorlari — Xitoy va Braziliya bilan aloqalarni uzishga vaʼda bergan. Shuningdek, u harbiy diktatura qurbonlari sonini shubha ostiga olgan va iqlim o‘zgarishiga inson faoliyati sabab bo‘lganini tan olmaydi.
Mileyni sobiq va amaldagi davlat rahbarlari tabrikladi
Ayni paytda, Braziliya prezidenti Luis Inasiu Lula da Silva X ijtimoiy tarmog‘i orqali Argentina yangi hukumatiga Miley ismini tilga olmay, "omad va muvaffaqiyat" tiladi.
"Braziliya argentinalik birodarlarimiz bilan hamkorlik qilish uchun doimo tayyor bo‘ladi", — deya qo‘shimcha qildi prezident.
Chili prezidenti Gabriel Borich Font ham X ijtimoiy tarmog‘ida Mileyga tabriklarni yetkazdi. Ammo Kolumbiya prezidenti Gustavo Petro Argentinadagi prezidentlik saylovlarida o‘ng qanot nomzodi g‘alabasidan hafsalasi pir bo‘lganini bildirib, buni "Lotin Amerikasi uchun qayg‘uli voqea" deb atadi.
"Neoliberalizm endi jamiyatga hech narsa taklif qila olmaydi, u insoniyatning dolzarb muammolariga javob bera olmaydi", — deb yozgan Petro X ijtimoiy tarmog‘ida.
Ayni paytda, AQSH sobiq prezidenti Donald Tramp Truth Social ijtimoiy tarmog‘ida Miley bilan "juda faxrlanishini" aytdi. 2024 yilda AQSH prezidentligi uchun yana kurashmoqchi bo‘lgan respublikachi: "Siz o‘z mamlakatingizni rivojlantirasiz va Argentinani yana buyuk qilasiz", deb yozgan.
