Ta’limda psixologik nazorat kuchayadi: o‘quvchilar va pedagoglar har yili tekshiruvdan o‘tadi

 

“Uzluksiz ta’lim tizimida psixologik xizmat sohasini ilmiy asosda rivojlantirish chora-tadbirlari to‘g‘risida”gi Prezident qarori qabul qilindi.

 

Qarorga ko‘ra, barcha ta’lim tashkilotlarining pedagoglari, tarbiyachilari, o‘quvchilari, tarbiyalanuvchilari va talabalari bir o‘quv yilida kamida bir marta maqsadli psixologik diagnostikadan o‘tkaziladi.

 

Mazkur tizim ikki bosqichda joriy etiladi. Birinchi bosqichda, 2026/2027-o‘quv yilidan boshlab, maktabgacha va umumiy o‘rta ta’lim tashkilotlari qamrab olinadi. Ikkinchi bosqichda esa, 2027/2028-o‘quv yilidan o‘rta maxsus, kasbiy va oliy ta’lim tashkilotlarida yo‘lga qo‘yiladi.

 

Psixologik diagnostika qanday tashkil etiladi?

Diagnostika Psixologiya ilmiy-tadqiqot instituti tomonidan maxsus elektron platforma orqali amalga oshiriladi. Bunda shaxsga doir ma’lumotlar va tekshiruv natijalarining maxfiyligi ta’minlanishi belgilangan.

 

Olingan natijalar sun’iy intellekt texnologiyalari yordamida tahlil qilinib, pedagog va o‘quvchilar quyidagi guruhlarga ajratiladi:

• “Psixologik barqaror”;

• “Psixologik qo‘llab-quvvatlashga muhtoj”;

• “Faol psixologik qo‘llab-quvvatlash zarur”.

 

Psixologik qo‘llab-quvvatlashga muhtoj deb topilganlarga ta’lim tashkilotining psixologi biriktiriladi. Faol psixologik qo‘llab-quvvatlash zarur bo‘lganlar bilan esa tegishli hududdagi mentor psixologlar ishlaydi.

 

Psixologlarni rag‘batlantirish va malakasini oshirish

Qarorda psixologik xizmat xodimlarining malakasini oshirish va ularni rag‘batlantirish choralari ham nazarda tutilgan.

 

Kaskadli malaka oshirish kurslariga o‘qituvchi sifatida jalb etilgan psixologlarga kurs davomida asosiy ish joyidagi lavozim maoshining 20 foizi miqdorida ustama to‘lanadi.

 

O‘quv yili davomida psixologik barqarorlikni ta’minlashda yuqori natijalarga erishgan 150 nafar mentor psixologga mehnatga haq to‘lashning eng kam miqdorining 20 baravari miqdorida bir martalik moddiy rag‘bat beriladi.

 

Shuningdek, ta’lim tashkilotlaridagi psixologik xizmat xodimlari har besh yilda kamida bir marta malaka oshirishi shart etib belgilanmoqda.

 

Psixologiya ilmiy-tadqiqot instituti tashkil etiladi

Nizomiy Ganjaviy nomidagi O‘zbekiston milliy pedagogika universitetining Psixologiya o‘quv-ilmiy markazi negizida Psixologiya ilmiy-tadqiqot instituti tashkil etiladi. Institut Ta’lim va ilm-fan vazirligi bo‘ysunuviga o‘tkaziladi.

 

2027-yil 1-yanvardan institutda Raqamli psixologiya va sun’iy intellekt, Ta’lim psixologiyasi va psixologik xizmat, Psixologik salomatlik va profilaktika laboratoriyalari faoliyati yo‘lga qo‘yiladi.