Saida Mirziyoyeva Oguljahon Atabayeva va Laylo Aliyeva bilan uchrashdi
Ashxoboddagi muloqotda O‘zbekiston, Turkmaniston va Ozarbayjon o‘rtasidagi do‘stlik, o‘zaro ishonch hamda hamkorlikni yanada rivojlantirish masalalari yuzasidan fikr almashildi.
Prezidenti Administratsiyasi rahbari Saida Mirziyoyeva Ashxobod shahrida G‘amxo‘rlikka muhtoj bolalarga yordam ko‘rsatish xayriya jamg‘armasi vitse-prezidenti Oguljahon Atabayeva hamda Haydar Aliyev jamg‘armasi vitse-prezidenti Laylo Aliyeva bilan uchrashdi.
Saida Mirziyoyevaning ta’kidlashicha, tomonlar o‘rtasidagi muloqotlar yaxshi an’anaga aylanib bormoqda. Har bir uchrashuv fikr almashish, umumiy g‘oyalarni boyitish va hamkorlikda yangi loyihalarni amalga oshirish uchun imkoniyat yaratmoqda.
Shuningdek, O‘zbekiston, Turkmaniston va Ozarbayjonni ko‘p asrlik do‘stlik, o‘zaro ishonch hamda mushtarak qadriyatlar bog‘lab turishi qayd etildi.
Saida Mirziyoyeva uchrashuvlar kelgusida ham ezgu tashabbuslarni ro‘yobga chiqarishga, aholiga manfaat keltiradigan loyihalarni amalga oshirishga va uch mamlakat o‘rtasidagi yaqin aloqalarni yanada mustahkamlashga xizmat qilishiga umid bildirdi.
