Xitoyda bolalar o‘rtasida nomaʼlum xavfli kasallik tarqaldi

 

Jahon sog‘liqni saqlash tashkiloti (JSST) Xitoydan bolalarda nomaʼlum pnevmoniya avj olgani haqida qo‘shimcha maʼlumot so‘radi.

 

JSST matbuot xizmati Xitoy Xalq Respublikasi Milliy sog‘liqni saqlash komissiyasi 13-sentabr kuni Xitoyda respirator kasalliklar bilan kasallanish holatlari ko‘paygani haqida xabar berganini eslatdi. Keyin Xitoy rasmiylari buni antikovid cheklovlari olib tashlanishi va maʼlum gripp viruslarining tarqalishi bilan izohladi.

 

"JSST Xitoyga respirator kasalliklar va bolalarda pnevmoniya epidemiyalari ko‘payishi haqida batafsil maʼlumot berish uchun rasmiy so‘rov yubordi", — deyiladi tashkilot bayonotida.

 

Kuni kecha The Telegraph nashri Xitoy shimolidagi bolalarda nomaʼlum pnevmoniya avj olgani haqida ProMed (dunyo bo‘ylab odam va hayvonlar kasalliklari tarqalishini kuzatuvchi) maʼlumotlariga asoslanib xabar berdi. Nashrning qo‘shimcha qilishicha, Xitoy kasalxonalari "kasal bolalar bilan to‘lib ketgan" va epidemiya Pekin kabi yirik shaharlarga tarqalib bo‘lgan.

 

The Telegraph taʼkidlaganidek, aynan ProMedning 2019-yil dekabr oyi oxiridagi ogohlantirishi ko‘plab shifokorlar va olimlarning eʼtiborini ilgari nomaʼlum bo‘lgan, keyinchalik Sars-Cov-2 (COVID-19) deb ataladigan virusga qaratgandi.

 

Tayvanning FTV News telekanali ham Pekin va Liaoning kasalxonalari kasal bolalar bilan to‘lib ketgani haqida xabar beradi.

 

"Ular yo‘talmaydi va hech qanday alomat yo‘q. Ularda shunchaki yuqori harorat (isitma) bor, ko‘pchilikning o‘pkasida tugunlar paydo bo‘ladi", — dedi nashrga poytaxtliklardan biri.

 

Pekinlik yana bir fuqaroning aytishicha, endi shamollash belgilari bilan maktablarga kelish taqiqlangan va sodir bo‘layotgan barcha hodisalar "davlat siri"dir.