Toshkent xalqaro muloqot maydoniga aylanadi: BMT sessiyasi o‘tkaziladi
Toshkentdagi sessiyada giyohvandlik vositalari noqonuniy muomalasiga qarshi kurashish, mintaqaviy hamkorlik va tajriba almashish masalalari muhokama qilinadi.
2026-yil 15–18-dekabr kunlari Toshkent shahrida BMTning Yaqin va O‘rta Sharqda giyohvandlik vositalarining noqonuniy muomalasi va u bilan bog‘liq masalalar bo‘yicha kichik qo‘mitasining 58-sessiyasi bo‘lib o‘tadi. Bu haqda “Dunyo” axborot agentligi xabar berdi.
Sessiyaga tayyorgarlik va uni tashkil etish masalalari O‘zbekiston elchixonasi diplomatlarining BMT Giyohvandlik vositalari va jinoyatchilik bo‘yicha boshqarmasi rahbar organlari kotibiyati rahbari Jo Dedeyn-Amann bilan uchrashuvida muhokama qilingan.
Mazkur kichik qo‘mita BMTning Giyohvandlik vositalari bo‘yicha komissiyasining mintaqaviy yordamchi organi hisoblanadi. Uning tashkil etilishi 1973-yilda BMT Iqtisodiy va ijtimoiy kengashi tomonidan ma’qullangan. Hozirda qo‘mita tarkibiga O‘zbekiston bilan birga 23 ta davlat kiradi.
Tashkilotning asosiy vazifalari giyohvandlik vositalari noqonuniy muomalasiga qarshi kurashishda mintaqaviy hamkorlikni rivojlantirish, ma’lumot va tajriba almashish hamda narkojinoyatchilikka qarshi kelishilgan yondashuvlarni ishlab chiqishdan iborat.
Toshkentdagi sessiyada a’zo davlatlar, kuzatuvchi mamlakatlar va xalqaro tashkilotlar vakillari ishtirok etishi kutilmoqda. Uchrashuvda mintaqadagi dolzarb muammolarni muhokama qilish, transmilliy tahdidlarga qarshi hamkorlikni kuchaytirish va amaliy chora-tadbirlarni belgilash rejalashtirilgan.
O‘zbekiston uchun tadbir mezbonligi mamlakatning xalqaro xavfsizlikni mustahkamlash borasidagi hamkorligini rivojlantirish, shuningdek, giyohvandlik vositalarining noqonuniy muomalasiga qarshi kurashish sohasidagi tajribasi va tashabbuslarini taqdim etish imkonini beradi.
Bu jarayon O‘zbekistonning 2031-yilda BMT Jinoyatchilikning oldini olish va jinoiy odil sudlov masalalari bo‘yicha 16-kongressiga mezbonlik qilishga tayyorgarligi bilan ham bog‘liq. Mazkur tashabbus 2026-yil 26-sentabr – 1-oktyabr kunlari Abu-Dabida o‘tkazilgan 15-kongress ishtirokchilari tomonidan qo‘llab-quvvatlangan va navbatdagi kongressni O‘zbekistonda o‘tkazish tasdiqlangan.
