Dron orqali aniqlangan qonunbuzilish: Buxoroda noqonuniy qum-shag‘al qazib olish to‘xtatildi
Mutaxassislar tomonidan tabiatga yetkazilgan zarar 8,9 milliard so‘mga baholandi.
Buxoro viloyatining G‘ijduvon tumanida noqonuniy qum-shag‘al qazib olish holati aniqlandi. Bu haqda viloyat Ekologiya bosh boshqarmasi matbuot xizmati xabar berdi.
Ma’lum qilinishicha, Ekologiya bosh boshqarmasi Ekopolitsiya xodimlari dron yordamida o‘tkazgan nazorat-reyd tadbirlari davomida «Ko‘kcha» mahallasi hududidagi yaylov yer maydonida qonunbuzilish holatini aniqlagan.
O‘rganishlar davomida fuqaro B.G‘. o‘ziga tegishli bo‘lmagan hududdan noqonuniy ravishda qum-shag‘al aralashmasini qazib olgani ma’lum bo‘lgan.
Mutaxassislar o‘tkazgan hisob-kitoblarga ko‘ra, mazkur harakatlar oqibatida atrof-muhitga 8,9 milliard so‘mlik zarar yetkazilgan.
Holat yuzasidan to‘plangan hujjatlar huquqiy baho berish, qonuniy chora ko‘rish hamda tabiatga yetkazilgan zararni undirish masalasini hal etish uchun Buxoro viloyati prokuraturasiga yuborilgan.
