1000 dollar qarz, 10 ming dollarlik tilxat: Toshkent viloyatida gumonlanuvchi qamoqqa olindi
U fuqarolarga bergan qarzidan 10 baravar ko‘p pul talab qilganlikda gumonlanmoqda.
Toshkent viloyatida fuqarolarga qarz berib, amalda berilgan mablag‘dan 10 baravar ko‘p summa ko‘rsatilgan tilxat yozdirish orqali pul undirishda gumonlangan shaxs qo‘lga olindi. Bu haqda viloyat IIBB matbuot xizmati xabar berdi.
Ma’lum qilinishicha, holat Ichki ishlar vazirligi tomonidan respublika miqyosida o‘tkazilayotgan “Xavfsiz va sog‘lom yurt” tezkor-profilaktik oyligining uchinchi bosqichi doirasida aniqlangan. Gumonlanuvchi 1978-yilda Olmaliq shahrida tug‘ilgan Kim Pavel Leonidovich ekani aniqlangan.
Tergov ma’lumotlariga ko‘ra, u fuqarolarga o‘z hisobidan qarz berib, haqiqatda berilgan mablag‘dan 10 baravar ko‘p summa ko‘rsatilgan tilxat yozdirib olgan. Jumladan, bir fuqaroga 1 ming dollar qarz berib, undan 10 ming dollar olgani haqida tilxat rasmiylashtirgan.
Oradan ma’lum vaqt o‘tgach, gumonlanuvchi ushbu tilxat asosida fuqarolik ishlari bo‘yicha sudlarga murojaat qilgan va pul undirish haqida hal qiluv qarorlari chiqarilishiga erishgan. Natijada ayrim fuqarolarning oylik ish haqidan pul undirilgan.
Jinoyat ishi doirasida gumonlanuvchining yashash xonadoni va ish ofisi ko‘zdan kechirilgan. Tekshiruv davomida fuqarolarga tegishli 100 ga yaqin tilxat, 55 ta uy-joyning kadastr hujjati, bitta pnevmatik qurol hamda Majburiy ijro byurosining qariyb 50 nafar fuqarodan pul undirishga oid hujjatlari topilgan.
Hozirga qadar Toshkent viloyati IIBB huzuridagi Tergov boshqarmasiga mazkur shaxsdan jabr ko‘rganini bildirgan 65 nafar fuqaro murojaat qilgan.
Holat yuzasidan Jinoyat kodeksining 168-moddasi 4-qismi “a” bandi, 188-moddasi 1-qismi hamda 205-moddasi 2-qismi “a” bandi bilan jinoyat ishi qo‘zg‘atilgan.
Gumonlanuvchi protsessual tartibda ushlanib, sud qarori bilan unga nisbatan qamoqqa olish tarzidagi ehtiyot chorasi qo‘llangan. Hozirda tergov harakatlari davom etmoqda.
