Buxorodagi tarixiy binoga reklama banneri va “konditsioner” o‘rnatildi

 

Madaniy meros agentligi holatga munosabat bildirdi. 

Maʼlum qilinishicha, mutaxassislar ishtirokida olib borilgan o‘rganishlar jarayonida shaharda joylashgan madaniy meros obyekti hisoblangan “Tursunjon” madrasasining tashqi devoriga havo sovitkich va reklama banneri tarixiy obyektlardan foydalanish talablariga zid ravishda o‘rnatilganligi aniqlandi. Ushbu holatni bartaraf etish maqsadida obyektga o‘rnatilgan havo sovitkichi va reklama banneri olib tashlandi. Shuningdek, binoning hujrasidan noqonuniy foydalanib kelayotgan fuqaroga nisbatan chora ko‘rildi.

 

Madaniy meros agentligining Buxoro viloyat boshqarmasi tomonidan kelgusida shu singari holatlarning oldini olish maqsadida obyekt foydalanuvchilariga tushuntirish ishlari olib borildi.

Shuningdek, agentlik bu kabi holatlarga keng jamoatchilikning befarq bo‘lmagani hamda madaniy meros obyektlarini asrab-avaylashga o‘z hissalarini qo‘shayotganliklari uchun minnatdorchilik bildirdi.