Tashkilot va idoralarning ishonch telefonlari “sirli mijoz” tadbiri asosida o‘rganiladi
Prezident farmoni bilan Korrupsiyaga qarshi kurashish agentligiga yangi vazifa yuklatilmoqda.
O‘zbekistondagi tashkilot va idoralarning "Ishonch telefonlari" faoliyati “Sirli mijoz” tadbiri asosida o‘rganiladi.
Hujjat bilan Korrupsiyaga qarshi kurashish agentligiga davlat organlaridagi ishonch telefonlarining doimiy ravishda ishlab turishini tekshirish uchun “Sirli mijoz” tadbiri asosida o‘rganish vazifasi yuklatilmoqda.
Bunda ishonch telefonlarining (Call-markaz) hamda davlat tashkilotlarining o‘z rasmiy veb-saytlarida eʼlon qilingan telefon raqamlarining doimiy ravishda ishchi holatdaligi, maʼlumotlar almashinuvi samaradorligi, qayta aloqaning mavjudligi, shu jumladan, tezkorligi va belgilangan muddatlarda amalga oshirilishi darajasini tekshirish ishlari olib boriladi.
Agentlikning masʼul xodimlari tomonidan aloqa vositalaridan (telefon qo‘ng‘iroqlari, elektron pochta va boshqa aloqa kanallari) foydalangan holda masofaviy tartibda o‘tkaziladi.
“Natijalar bo‘yicha davlat organlari va tashkilotlariga o‘zining ochiqlikni taʼminlashga oid faoliyatini yaxshilash hamda takomillashtirish uchun ko‘rib chiqilishi majburiy bo‘lgan taqdimnoma yuboriladi”, — deyilgan hujjat matnida.
Bunda quyidagilar taqiqlanadi:
“Qayta aloqaning sirli mijozi” tadbirini o‘tkazishda huquqbuzarliklar sodir etishga og‘dirish va undash, shu jumladan, nizoli, bahsli holatlarni va kamchiliklarni sunʼiy ravishda keltirib chiqarish;
“Qayta aloqaning sirli mijozi” tadbirini o‘tkazishda Agentlik masʼul xodimlaridan tashqari boshqa shaxslardan foydalanish;
o‘rganish obyektiga tashrif buyurish.
Tadbir natijalari bo‘yicha aniqlangan kamchiliklar vazirlik va idoralar xodimlarini javobgarlikka tortish uchun asos bo‘lmaydi, ish beruvchi tomonidan shaxsiy tashabbus ko‘rsatilgan holatlar bundan mustasno.
