Toshkentda maktab o‘quvchisi, Yangiyo‘l tumanida esa ayol tok urishi oqibatida vafot etdi
Bu haqda "Hududiy elektr tarmoqlari" AJ matbuot kotibi maʼlum qildi.
Yunusobod tumanidagi 99-sonli maktabning 8-sinf o‘quvchisi ochiq turgan elektr toki simiga tegib ketishi oqibatida vafot etdi.
Bola maktabni yorituvchi chiroq ustunidagi ochiq bo‘lgan elektr simiga tegib ketgan va tok urishi oqibatida voqea joyida vafot etgan.
Ijtimoiy tarmoqlarda tarqalgan videolarga ko‘ra, voqea kecha tunda yuz bergan.
Shuningdek, Toshkent viloyatida bir ayol uzilib ketgan elektr simiga tegib ketishi oqibatida vafot etgan.
Aytilishicha, Yangiyo‘l tumani “Nurobod” mahallasidagi yangi o‘tkazilgan elektr energiyasi simi uzilgan. Joriy yilning 26 noyabr kuni soat 16:00 lar atrofida ayol shu simga tegib ketgan va kuyish jarohatlari bilan shifoxonaga olib borilgan.
Ko‘rsatilgan tibbiy muolajalarga qaramay, ayol kecha, 27 noyabr kuni shifoxonada vafot etgan.
