"Oddiy ko‘ringan imlo belgisi butun boshli davlat va millat nomining xato yozilishiga sabab bo‘lmoqda"
Saida Mirziyoyeva lotin alifbosida O‘zbekiston so‘zining yozilishidagi xatoliklar haqida gapirdi.
"Jadidlar: milliy o‘zlik, istiqlol va davlatchilik g‘oyalari" mavzusida xalqaro ilmiy konferensiyada so‘zga chiqib, unda lotin alifbosidagi islohotlar kechikayotgani va buning oqibatlari haqida to‘xtaldi.
Mirziyoyeva O‘zbekiston so‘zining lotinchada yozilishi bo‘yicha 7 xil variantni ko‘rsatib, "qaysi biri to‘g‘ri?", —degan savol bilan murojaat qildi.
"Ko‘rib turganingizdek, bir qarashda oddiy ko‘ringan imlo belgisi butun boshli Davlat va Millatning nomi xato yozilishiga sabab bo‘lmoqda. Men buni tuzatish zarur bo‘lgan holat deb bilaman. Biz bunday masalalarda hadeb bahslashavermay, tezroq qaror qabul qilishimiz, yo‘l qo‘yilgan bu jiddiy xatoni zudlik bilan tuzatishimiz muhim deb hisoblayman. Chunki, gap bizning Millatimiz, g‘ururimiz, yurtimiz nomi haqida ketyapti", — deya gapirib o‘tdi Mirziyoyeva.
