Andijonda benzinni aldab sotayotgan zapravkalar aniqlandi
Ular Ai-80 benzinini Ai-92 yoki Ai-95 markali benzin sifatida sotilayotgan bo‘lgan.
Andijon viloyatida faoliyat olib borayotgan kuz-qish shtabiga benzin sifati va uning yetishmovchiligi bo‘yicha muroajatlar ko‘paygan. Bu haqda Andijon viloyati hokimining matbuot kotibi Muslimbek Ibrohimov maʼlum qildi.
Uning aytishicha, viloyat hududiga 500 tonna Ai-80 markali benzin keltirilgan bo‘lsada, haydovchilardan ushbu turdagi benzin yetishmayotgani haqida shikoyatlar kelib tushmoqda.
Murojaatlar nazoratga olinib, tegishli mutasaddi va organlar tomonidan o‘rganligan. Natijada 7 ta AYQSHda shunday holat aniqlangan va ularga nisbatan tegishli tartibda chora ko‘rilishi taʼminlangan.
“Energiyainspeksiya” Andijon hududiy boshqarmasi boshlig‘i o‘rinbosari Sirojiddin Muhtorovning maʼlum qilishicha, 14-15 dekabr kunlari Andijon shahri va Andijon tumanidagi AYQSHlardan olingan 17 ta namunadan 7 tasida belgilangan meʼyorlarga javob bermagani aniqlangan.
Qo‘shimcha qilinishicha, viloyatning boshqa shahar va tumanlarida ham shunday o‘rganishlar o‘tkazish rejalashtirilgan.
