Jizzaxda fuqaro shlakli blok ishlab chiqaruvchi uskunaga tushib ketdi
Holat yuzasidan viloyat FVV maʼlumot berdi.
Jizzax viloyatida qurilish materiali ishlab chiqaruvchi moslamaga tushib ketgan fuqaro hayoti saqlab qolindi. Bu haqda viloyat Favqulodda vaziyatlar boshqarmasi xabar berdi.
Qayd etilishicha, Jizzax shahar Shodlik mahallasida fuqaro ehtiyotsizligi oqibatida shlakli blok ishlab chiqaruvchi uskunaga qisilib qolganligi to‘g‘risida Favqulodda vaziyatlar boshqarmasining Tezkor boshqaruv markaziga xabar tushgan.
Shunga ko‘ra zudlik bilan boshqarma qutqaruvchilar aytilgan manzilga yetib borib, fuqaroni xavfsiz joyga olib chiqishgan va birinchi yordam ko‘rsatishgan. Maʼlum bo‘lishicha fuqaro ehtiyotsizlik oqibatida uskunaga tushib ketgan. Ayni vaqtda uning ahvoli yaxshi.
