Metan zapravkalarga kiritilgan cheklovlar olib tashlandi
Kecha respublikadagi zapravkalarning 91 foizi to‘liq ish faoliyatida xizmat ko‘rsatgan.
Bu haqda AOKAda o‘tkazilgan brifingda Energetika vazirligi axborot xizmati rahbari Hasan Toshxo‘jayev maʼlum qildi.
Unda qayd etilishicha, soha korxonalari tomonidan 670,6 million kVt-soat elektr energiyasi ishlab chiqarilgan. Isteʼmolchilarga 624,2 million kVt-soat elektr energiyasi yetkazib berilgan. Respublikada tabiiy gaz isteʼmoli 446 million metr kubni tashkil qilgan.
Ushbu vaqt oralig‘ida tizimda yirik avariyalar hamda favqulodda hodisalar ro‘y bergani yo‘q. Barcha tizim tashkilotlarida 24 soatlik tunu kun navbatchilik yo‘lga qo‘yilib, maxsus brigadalar elektr energiyasi va gaz taʼminotida yuzaga kelgan nosozliklarni zudlik bilan bartaraf etgan.
Kecha, 3 yanvar kuni esa elektr stansiyalar orqali jami 234,1 million kVt-soat elektr energiyasi ishlab chiqarilib, isteʼmolchilarga 219,8 million kVt-soat elektr energiyasi yetkazib berildi. Buning uchun issiqlik elektr stansiyalarida 47,4 million kubometr tabiiy gaz, 20,6 ming tonna ko‘mir hamda 2,4 ming tonna mazut yoqildi. Respublika tabiiy gaz isteʼmoli 3 yanvar kuni 150,8 million kubometrni tashkil qildi. Aholi va ijtimoiy soha obyektlarini birinchi navbatda tabiiy gaz bilan taʼminlash hamda quvurlardagi bosimni bir meʼyorda tutib turish maqsadida metan zapravkalarga kiritilgan cheklovlar olib tashlandi. Barcha hududlardagi avtomobillarga gaz to‘ldirish kompressor shoxobchalarning ish faoliyati mahalliy hokimliklar tomonidan tasdiqlangan reja-grafik asosida tizimli ravishda yo‘lga qo‘yilmoqda. Kecha mamlakatimizdagi jami 1 ming 507 ta metan zapravkaning 1 ming 363 tasi, yaʼni 91 foizi to‘liq ish faoliyatida ishlagan, — dedi H.Toshxo‘jayev.
Brifingda avtobenzin va dizel yonilg‘isi talabni qoplaydigan darajada yetkazib berilayotgani ham taʼkidlandi. Unga ko‘ra, 3 yanvar kuni “O‘zbekneftgaz” aksiyadorlik jamiyati tomonidan mamlakatimizdagi barcha avtomobillarga yonilg‘i quyish shoxobchalariga jami 2 ming 607 tonna avtobenzin yetkazilgan. Shuningdek, avtomobillarga gaz to‘ldirish kompressor shoxobchalariga 12,1 million metr kub tabiiy gaz hamda 600 tonna suyultirilgan gaz yetkazib berildi.
Elektr qurilmalari va gaz taʼminotida yuzaga kelgan nosozlik o‘z vaqtida bartaraf qilinmoqda.
