FT: Rossiya hali ham radioelektron urushda Ukrainani mag‘lub etyapti
Xususan, G‘arbning HIMARS raketalarini urib tushirmoqda.
The Financial Times gazetasining yozishicha, Rossiya harbiylari radioelektron urush tizimlaridan foydalanishda hamon ustunlikka ega va ulardan muvaffaqiyatli foydalanmoqda. Jumladan, G‘arbning HIMARS tizimlaridan uchirilgan ko‘plab raketalarni urib tushirishda radioelektron tizimlardan faol foydalanilmoqda. Bu haqda nashr Ukraina va G‘arb ekspertlarining fikriga tayanib yozmoqda.
Maqolada taʼkidlanishicha, har ikki tomon ham radioelektron urush tizimlarini ishlab chiqishga katta mablag‘ sarflab keladi, biroq Moskva bu ishni yaxshiroq bajaryapti. Buning sababi sifatida Rossiyaning ushbu turdagi tizimlarga Ukrainaga keng miqyosli bosqin boshlanishidan oldin ham eʼtibor qaratgani keltirilmoqda.
FT jurnalistlari, shuningdek, Ukraina Qurolli kuchlari Bosh shtabida elektron va kiber urush uchun masʼul polkovnik Ivan Pavlenko bilan ham suhbatlashgan.
Pavlenkoning so‘zlariga ko‘ra, Rossiya radioelektron urush tizimlaridan Ukrainaning HIMARS raketalari va Excalibur artilleriya snaryadlari kabi aniq qurollarni yo‘qotish uchun ham foydalanadi. Shuningdek, Moskva ushbu tizim yordamida Ukraina armiyasini chalg‘itib, o‘zining joylashuvini bildiruvchi soxta nishonlar yaratmoqda va shuning ortidan Ukrainaning havo mudofaasi joylashuvini aniqlamoqda.
O‘z navbatida, Ukraina ham o‘zining radioelektron urush tizimlarini ishlab chiqarishni ko‘paytiryapti va G‘arbdan bunday jihozlarni yetkazib berishda yordam berishni so‘raydi, deb yozadi nashr.
Xususan, ukrainalik harbiylar tez orada Ukraina Qurolli kuchlarida foydalanishi rejalashtirilayotgan F-16 qiruvchi samolyotlari zamonaviy radioelektron urush tizimlari bilan jihozlanishini taʼkidlamoqda.
Kiyev, shuningdek, o‘z operatsiyalarini amalga oshirish uchun Rossiya radioelektron urush tizimlarining ayrim zaif tomonlarini topishga muvaffaq bo‘lgan. Ukrainaning Rossiya hududidagi nishonlarga, shu jumladan Kremlga berilgan muvaffaqiyatli zarbalari shular jumlasidandir, deyiladi maqolada.
Gazeta, shuningdek, Ukraina Qurolli kuchlari Sevastopolda Rossiya Qora dengiz floti kemalariga hujumlar paytida dushmanning radioelektron tizimlarini chalg‘itishga muvaffaq bo‘lganini qo‘shimcha qiladi.
