Qatar Toshkentda DXSH asosida ko‘p tarmoqli shifoxona quradi
O‘zbekistonning Dohadagi elchixonasi xodimlari Qatarning Elegancia Healthcare kompaniyasi tijorat ishlari bo‘yicha bosh direktori Desmond Donelli bilan muzokara o‘tkazdi.
Muloqot chog‘ida Qatarning mazkur kompaniyasi ishtirokida mamlakatda sog‘liqni saqlash sohasida loyihalarni amalga oshirish masalalari muhokama qilindi.
Diplomatlar Qatar tomoniga O‘zbekistonda sog‘liqni saqlash sohasida, xususan aholi salomatligini saqlash, tibbiyot xodimlarining salohiyatini oshirish uchun zarur shart-sharoitlar yaratish, tibbiy xizmatlar ko‘lami va sifatini oshirish bo‘yicha olib borilayotgan islohotlar to‘g‘risida batafsil maʼlumot berdi.
Qatar tomoni Toshkent shahrida 300 o‘rinli zamonaviy ko‘p tarmoqli shifoxonani davlat-xususiy sheriklik (DXSH) asosida barpo etish bo‘yicha birlamchi hujjatlarni joriy yanvar oyi oxiriga qadar yakunlanishini, loyihaning texnik-iqtisodiy asoslari esa mart oyida ishlab chiqilishi boshlanishini maʼlum qildi.
Mazkur loyihani amalga oshirishning dastlabki bosqichida Elegancia Healthcare kompaniyasiga to‘rt nafar o‘zbek mutaxassislari ishga qabul qilinishi taʼkidlandi.
Bundan tashqari, Elegancia Healthcare kompaniyasining The View Hospital, Military Medical City va Hopital Algero Qatari Alleman klinikalarida o‘zbekistonlik ingliz tilida erkin so‘zlasha oladigan shifokor va hamshiralarni ishga qabul qilish bo‘yicha kelishuvga erishildi.
