O‘zbekiston Tayvandagi saylov bo‘yicha o‘z pozitsiyasini bildirdi
Oroldagi saylovlarda Xitoy xushlamaydigan nomzod g‘olib bo‘lgandi.
O‘zbekiston TIV Tayvandagi saylovlar xususida bayonot berdi.
Unda aytilishicha, O‘zbekiston tomoni Tayvanda bo‘lib o‘tgan saylovlar bilan bog‘liq vaziyatni diqqat bilan kuzatib bormoqda.
“Yagona Xitoy” tamoyilini qatʼiy qo‘llab-quvvatlashimiz va Xitoy Xalq Respublikasi hukumati Xitoyning yagona qonuniy hukumati, Tayvan esa Xitoy hududining ajralmas qismi ekanini yana bir bor maʼlum qilamiz.
O‘zbekiston Respublikasi ikki sohil o‘rtasidagi munosabatlarning tinch yo‘l bilan rivojlanishining qatʼiy tarafdori hamda XXR hukumatining Xitoyni birlashtirish yo‘lidagi barcha saʼy-harakatlarini qo‘llab-quvvatlaydi", — deyiladi TIV bayonotida.
Eslatib o‘tamiz, bir necha kun avval Tayvanda bo‘lib o‘tgan prezidentlik saylovlarida AQSH bilan yaqinlashish tarafdori Lay Sinde g‘alaba qozondi.
