“Yagona to‘g‘ri yo‘limiz – xorijiy investisiyalarni faol jalb qilish va eksportni ko‘paytirish”
Prezident raisligida eksport, investisiya va mahalliy sanoatdagi vazifalar bo‘yicha yig‘ilish boshlandi
Davlatimiz rahbari yalpi ichki mahsulotni oshirish bo‘yicha katta marra olinganini, lekin bunga faqat ichki investisiya va ichki bozor bilan erishib bo‘lmasligini qayd etdi:
“Yagona to‘g‘ri yo‘limiz – xorijiy investisiyalarni faol jalb qilish va eksportni ko‘paytirish”.
Prezident bevosita investisiya, sanoat va eksportga mas’ul 11 ta vazirlik va idora, 10 ta uyushma, xorijdagi diplomatik vakolatxonalar, bundan tashqari, barcha vazirlik, tarmoq va hududlarda eksport va investisiyaga mas’ul rahbar o‘rinbosari faoliyat yuritayotgan investisiyalar va tashqi savdo tizimining faoliyati juda sustligini ko‘rsatib o‘tdi.
Hozirgi murakkab vaziyatda tizimda investisiya va eksport bo‘yicha chuqur tahlil yo‘qligi tanqid qilindi. Asosiy bozorlarimiz bo‘lgan mamlakatlardagi devalvatsiya, jahonda ro‘y berayotgan ziddiyatlar va logistika hisobiga ularga eksport kamaygan.
Bunday murakkab vaziyat bugun yoki kecha boshlanmagani, Investisiya vazirligi va tarmoqlar rahbarlari eksport bozorlarini diversifikatsiya qilish ustida o‘z vaqtida bosh qotirmagani ko‘rsatib o‘tildi.
