Toshkentdagi korxonalarda chang-gaz tozalash uskunalari o‘rnatiladi
Ekologiya vazirligi korxonalar faoliyati yuzasidan monitoring o‘tkazmoqda
Ekologiya, atrof-muhitni muhofaza qilish va iqlim o‘zgarishi vazirligi tomonidan Toshkent shahrining Chilonzor, Sergeli va Yangihayot tumanlarida atmosfera havosining ifloslanish darajasi ortib borayotgani tufayli atrof-muhitga taʼsir ko‘rsatuvchi korxonalar faoliyati yuzasidan ekologik monitoring o‘tkazildi.
Monitoring davomida Chilonzor tumanida joylashgan atrof-muhitga taʼsir ko‘rsatishning I va II toifasiga mansub 70 ta korxonaga, jumladan, beton, un mahsulotlari, keramika va kafel, mato-gazlama va boshqa mahsulotlar ishlab chiqaradigan korxonalarga chang-gaz tozalash uskunalarini o‘rnatish to‘g‘risida ogohlantirish xatlari berildi. Shuningdek, Sergeli tumanida atrof-muhitga taʼsir ko‘rsatishning I va II toifasiga mansub 68 ta korxona chang gaz tozalash uskunalari o‘rnatish to‘g‘risida ogohlantirildi.
Qolaversa, Yangihayot tumanida joylashgan atrof-muhitga taʼsir ko‘rsatishning I va II toifasiga mansub 22 ta korxonaga chang-gaz tozalash uskunalari o‘rnatish to‘g‘risida ogohlantirish xatlari berildi.
Maʼlumot uchun, “Tabiatni muhofaza qilish to‘g‘risida”gi Qonunning 9-moddasiga asosan 2024 yil 12 yanvar holatiga Toshkent shahrida joylashgan 42 ta korxona tomonidan chora-tadbirlar rejasi taqdim etilgan. Shundan atmosfera havosini muhofaza qilish bo‘yicha 75 ta tadbir belgilangan.
