"Mahalla yettiligi" xodimlarining kasbiy bilim va ko‘nikmalari yanada rivojlantiriladi
Bugundan Davlat boshqaruvi akademiyasida Respublika bo‘ylab “mahalla yettiligi”ni qayta tayyorlovchi trenerlar o‘qitilishiga start berildi.
Mahalla raisi, mahalladagi hokim yordamchisi, yoshlar yetakchisi, xotin-qizlar faoli, profilaktika inspektori, ijtimoiy xodim, soliq inspektoridan iborat “mahalla yettiligi” bugun tom maʼnoda fuqarolarning deyarli barcha ijtimoiy-iqtisodiy muammolarini hal qilishda, ularga qulay shart-sharoit yaratishda xizmat qiladigan muhim tizimga aylanib ulgurdi.
Ushbu tizimni yana-da samarali ishlashini tashkil qilish maqsadida davlatimiz rahbari tomonidan qator vazifalar belgilab berilgan. Hususan, “mahalla yettiligi”ni tashkil qiluvchi davlat xizmatchilarini zamonaviy tajribalar asosida o‘qitish hamda qayta tayyorlash shular jumlasidandir.
Respublikamizda 10 mingga yaqin mahallalar borligi, hamda mavjud “mahalla yettiligi” vakillarining umumiy soni 55 mingdan ortiqligi inobatga olinsa, ularni qayta tayyorlash ko‘p vaqt va resursni talab etuvchi mushkul ishdek tuyulishi mumkin.
Endilikda ushbu vazifani bajarish maqsadida trenerlarni o‘qitish jarayoni boshlandi. Ular esa o‘z o‘rnida Respublika bo‘ylab tarqalib, “mahalla yettiligi”ni qayta tayyorlash, zamon talabidagi bilim va tajribani yetkazish vazifasi bilan shug‘ullanadilar.
Bugun Akademiyada tashkil etilgan maxsus o‘quvda Jizzax, Sirdaryo, Andijon, Farg‘ona, Namangan, Toshkent viloyatlari va Toshkent shahridan jami 157 nafar trenerlar ishtirok etmoqdalar. Qolgan viloyatlardan trenerlarni tayyorlash 25-26 yanvar kunlari amalga oshiriladi.
Maxsus o‘quv dasturining ochilish marosimida Davlat boshqaruvi akademiyasi rektori A. Bekmurodov so‘zga chiqib, mahallalarning bugungi kunda hayotimizda tutgan o‘rni hamda ushbu o‘quvlardan kutilayotgan natijalar to‘g‘risida so‘z yuritdi.
Shundan so‘ng Davlat xizmatlarini rivojlantirish agentligi direktorining birinchi o‘rinbosari O. Xasanov yig‘ilganlarga "mahalla yettiligi"ni o‘qitishda nimalarga ahamiyat qaratish lozimligi to‘g‘risida gapirdi.
Maʼlumot uchun: Barcha trenerlar Davlat boshqaruvi akademiyasida joriy yilning 23-26 yanvar kunlari tayyorlanadi. 2024 yil 29 yanvaridan 25 fevraliga qadar Respublikadagi mavjud 55 mingdan ortiq "mahalla yettiligi"ga kiruvchi masʼullar o‘qitiladi.
