“Sharq” nashriyoti binolari Madaniy meros obyektlari ro‘yxatidan chiqarildi
Davlat aktivlarini boshqarish agentligi 2023 yilning 20 sentyabrida “Sharq” nashriyot-matbaa korxonasi binolari va O‘zA binosini yagona mulkiy majmua sifatida savdoga qo‘ygan edi.
Madaniy meros obyektlari ro‘yxatida borligi tufayli sotilmay qolgan “Sharq” nashriyoti binolari ushbu ro‘yxatdan chiqarildi.
Vazirlar Mahkamasining 2024 yil 15 yanvardagi qarori bilan Milliy ro‘yxatga tegishli o‘zgartirish kiritildi. Unda Toshkent shahar Buyuk Turon ko‘chasi 41-uyda joylashgan “Sharq” nashriyot-matbaa korxonasi binolari Moddiy madaniy merosning ko‘chmas mulk obyektlari milliy ro‘yxatidan chiqarib yuborilgan.
Davlat aktivlarini boshqarish agentligi 2023 yil 20 sentyabrida “Sharq” nashriyot-matbaa korxonasi binolari va O‘zA binosini yagona mulkiy majmua sifatida savdoga qo‘ygan edi.
Shundan keyin Madaniy meros agentligi har ikkala bino O‘zbekiston moddiy madaniy merosning ko‘chmas mulk obyektlari milliy ro‘yxatiga kiritilganini eslatib, ularni auksiondan olib tashlash bo‘yicha ogohlantirish bergan edi.
