Ziroat Mirziyoyeva Pekindagi Milliy muzeyga tashrif buyurdi
Birinchi xonim ikki xalq o‘rtasida madaniy-gumanitar hamkorlikni kengaytirish muhimligini taʼkidladi.
Prezident Shavkat Mirziyoyevning Xitoyga davlat tashrifi doirasida O‘zbekiston Respublikasining Birinchi xonimi Ziroat Mirziyoyeva Xitoy Xalq Respublikasi Raisining rafiqasi Pen Liyuan hamrohligida Pekindagi Xitoy Milliy muzeyini ko‘zdan kechirdi.
Ushbu hashamatli muzeyda Chin mamlakatining 5000 yildan ortiq tarixidan so‘zlovchi 620 mingdan ortiq noyob eksponatlar saqlanadi.
Birinchi xonimlar muzeydagi Xitoyning boy madaniyati haqida so‘zlovchi nodir ekspozitsiyalarni katta qiziqish bilan tomosha qildilar.
Samimiy suhbatda xalqlar madaniyati va qadriyatlari o‘xshashligi, rishtalar ko‘p ming yillik tarixga ega ekani, bularning barchasi bugungi munosabatlar rivojiga kuchli surʼat bag‘ishlayotgani qayd etildi.
Ziroat Mirziyoyeva ikki xalqni yana-da yaqinlashtirish, o‘zaro anglashuvni mustahkamlash maqsadida madaniy-gumanitar hamkorlikni kengaytirish muhimligini, muntazam o‘tkazib kelinayotgan Madaniyat kunlari bunga yorqin misol ekanini taʼkidladi.
Muzey bilan tanishuv iliq va samimiy ruhda o‘tdi.
