O‘tgan yili salkam 260 trillion so‘mlik davlat xaridlari amalga oshirilgan
Jami xaridlarning eng ko‘p ulushi hududlar kesimida qaysi shaharga to‘g‘ri kelgan?
Bu haqda AOKAda o‘tkazilgan brifingda Iqtisodiyot va moliya vazirligi boshqarma boshlig‘i Jasurbek Zokirov maʼlum qildi.
Shundan, byudjet buyurtmachilarining xaridi 77 trln so‘mni yoki 30 foizni tashkil etib, o‘tgan yilning mos davriga nisbatan 10,6 foizga, hamda davlat ulushi 50 foiz va undan yuqori bo‘lgan korxonalarning xaridi 176 trln so‘mni yoki 70 foizni tashkil etgan bo‘lib, o‘tgan yilning mos davriga nisbatan 30,7 foizga oshgan.
Davlat buyurtmachilari tomonidan 115 trln so‘mlik xaridlarni raqobatli tarzda amalga oshirish natijasida 8,2 trln so‘m mablag‘lar iqtisod qilinishiga erishildi.
Shuningdek, amalga oshirilgan jami xaridlarning eng ko‘p ulushi hududlar kesimida Toshkent shahri (39,6 foiz), Toshkent viloyati (14,8 foiz), Andijon viloyati (13,2 foiz) hamda Navoiy viloyatlariga (12,6 foiz) to‘g‘ri kelmoqda.
Davlat xaridlari tizimiga tadbirkorlik subyektlarini keng jalb qilish orqali sohada keng raqobat muhitini yaratish maqsadida tizimli ravishda amalga oshirilgan chora-tadbirlar natijasida 2024 yil 1 yanvar holatiga kelib davlat xaridlari elektron tizimlarida 231 mingta tadbirkorlik subyektlari ro‘yxatdan o‘tgan. Bu esa, o‘tgan yilning mos davriga nisbatan 12 foizga yaʼni 28 mingtaga oshgan.
