O‘zbekistonda 2023 yilda chiqindi uchun 565 mlrd undirildi
Hozirda 8 ta viloyatda chiqindi to‘lovlari uchun yangi tariflar tasdiqlangan.
2023 yilda chiqindilarni to‘plash va olib ketish bo‘yicha aholiga ko‘rsatilgan xizmatlar uchun “Yagona elektron tizim”da 565 mlrd so‘m mablag‘ undirildi. Bu haqda AOKAda o‘tkazilgan brifingda Sanitar tozalash ishlarini tashkil etish respublika markazi axborot xizmati rahbari Dilnoza Komilova maʼlum qildi.
Korxonalarning moddiy-texnika bazasini mustahkamlash uchun Osiyo taraqqiyot banki mablag‘lari hisobidan 300 ta 12 kub sig‘imli, Markaz mablag‘lari hisobidan esa 41 ta 7 kub sig‘imli maxsus texnikalar lizing shartlari asosida sanitar korxonalariga topshirildi.
Natijada bugungi kunda sanitar tozalash xizmatlari bilan aholining qamrov darajasi qo‘shimcha 2,5 mln kishiga, yaʼni 30 foizga ortishiga erishilgan.
Mamlakatda mavjud 299 ta chiqindini qayta ishlash korxonasi tomonidan qamrovga olingan aholidan olib chiqib ketilgan 7 mln tonnaga yaqin maishiy chiqindining 2,5 mln tonnasi qayta ishlanib, ularning qayta ishlash darajasi 37 foizga yetkazildi.
Bugungi kunda Andijon, Samarqand, Farg‘ona, Namangan, Toshkent, Sirdaryo, Buxoro, Surxondaryo viloyatlarida va Toshkent shahrida chiqindi to‘lovlari uchun yangi tariflar tasdiqlanishiga erishildi.
