Farg‘onada butun boshli oila is gazi oqibatida vafot etdi

Joriy yilning 26 yanvar kuni soat 12:30 atrofida Marg‘ilon shahar, Vatan MFYda joylashgan ko‘p qavatli uyning bir xonadonida istiqomat qilib kelgan, er-xotin 1967 yilda tug‘ilgan N.M., 1970 yilda tug‘ilgan Z.M., ularning qizi 1994 yilda tug‘ilgan D.I., nabiralari 2019 yilda tug‘ilgan S.M., 2017 yilda tug‘ilgan M.J. va 2021 yilda tug‘ilgan M.J.lar yashash xonadonida is gazidan zaharlanib, vafot etishgan.

 

Voqea joyi ko‘zdan kechirilganda marhumlar istiqomat qilgan xonadon uch xonadan iborat bo‘lib, xonadonning yopiq ayvon (balkon) qismiga o‘rnatilgan, chet elda ishlab chiqarilgan "Vaillant" isitiz qozoni (kotyol)dan tashqariga chiqarilgan mo‘risi qo‘lbola, polietilendan ishlangan bo‘lib, mo‘rini xonadan tashqariga chiqish qismidagi bir-biriga kirishgan joyi qizish hisobiga ochilib qolishi natijasida xonaga is gazi to‘planib qolgani ma’lum bo‘ldi.

 

Mutaxassislarining xulosasiga ko‘ra, ko‘zdan kechirishda isitish qozoni (kotyol)dan nostandart holatda mo‘ri tashqariga chiqarilganligi va polietilendan ishlangan mo‘ri qizishi natijasida kirishgan joyidan chiqib ketishi oqibatida, is gazi xonadonga tarqalishiga sabab bo‘lgani ko‘rsatilgan.

 

Sud-tibbiy ekspertizasining dastlabki ma’lumotnomasiga ko‘ra, marxumlarning o‘limi is gazidan o‘tkir zaharlanish, o‘tkir yurak nafas yetishmovchiligi oqibatida yuzaga kelganligi aniqlangan.

 

Hozirda tergovga qadar tekshirish harakatlari olib borilmoqda.