Yangiyo‘lda bir oilaning 5 nafar farzandiga “metrika” topshirildi
Ular tug‘ruqxonadan tashqarida tug‘ilganligi uchun guvohnoma ololmagandi.
Toshkent viloyati Yangiyo‘l tumanida bir ayolning turli yoshdagi 4 nafar farzandi va bir nafar nabirasiga tug‘ilganlik haqida guvohnoma topshirildi. Ularning shu paytgacha guvohnoma va boshqa hujjatlari yo‘q edi.
Ular tibbiy yordamsiz tug‘ruqxonadan tashqarida (xonadonida) tug‘ilganligi sababli bugungi kunga qadar tug‘ilganlik haqida guvohnoma ololmagan.
Sardorbek va Sevinch 16 yoshdan oshgan bo‘lsa-da, tug‘ilganlik haqidagi guvohnomasi mavjud bo‘lmaganligi sababli ID-karta berilmagan. Oilaning o‘rtancha farzandi Sadriddin 10 yoshga to‘lgan, biroq bugungi kunga qadar umumtaʼlim maktabiga, Samariddin va Bexruzbeklar esa bog‘chaga qabul qilinmagan edi.
Adliya vazirligi tashabbusi bilan o‘tkazilayotgan “Hech bir shaxs hujjatsiz qolmaydi” huquqiy aksiyasi doirasida Zulxumor opaning 4 nafar farzandlari va 1 nafar nevarasining tug‘ilishi rasmiylashtirilib, guvohnomalari shaxsan adliya vaziri o‘rinbosari X.Meliyev tomonidan topshirildi.
Eslatma: Huquqiy aksiya doirasida fuqarolar bevosita tuman (shahar) adliya bo‘limlarida tashkil etilgan maxsus shtablar yoki “1148” qisqa raqamli ishonch telefoni orqali murojaatlarini qoldirishlari mumkin.
