Surxondaryoda o‘quvchilar toshli, qiyalik yo‘llarda maktabga borayotganiga izoh berildi
Tarmoqlarda Sariosiyoda maktab bolalari qoniqarsiz yo‘ldan maktabga ketayotgani videosi tarqaldi.
Viloyat hokimligi internetda tarqalgan maktab o‘quvchilarining maktabga borish yo‘li haqidagi videoga izoh berdi.
Tarmoqlarda Surxondaryo viloyati Sariosiyo tumanining “Karsh” mahallasidagi bolalar toshloq, loy bo‘lib ketgan yo‘l orqali maktabga qatnayotgani aks etgan video tarqaldi. Holat yuzasidan viloyat hokimiyati munosabat bildirdi.
Taʼkidlanishicha, "Karsh" mahallasi Sariosiyo tumani markazidan qariyb 70 km uzoqlikda, tog‘li hududda joylashgan. Hududda 487 nafar fuqaro 91 ta xonadonda yashaydi. Mahalladagi 80 o‘rinli maktab 2018 yilda qurilgan va hozirda barcha zarur sharoitlar bilan taʼminlangan.
2022-2023 yillar davomida mahallaga transport borishi uchun 11 km uzunlikdagi tog‘li hudud orqali yangi yo‘l ochilgan. Mahallaning 5 km ichki yo‘llari toshlanib, taʼmirlangan. Shunga qaramay, videodagi ichki yo‘lda noqonuniy qurilmalar sababli taʼmirlash ishlari bajarilmay qolib ketgan.
“Yo‘llar, mahallalardagi infratuzilmani rivojlantirish avvalo aholi farovonligini yaxshilash uchun amalga oshirilayotgan bo‘lib, bolalarning sifatli taʼlim olishi hamda xavfsiz va qulay yo‘llardan maktabga borishlarini taʼminlash bizning vazifamiz.
Biroq ayni hozirgi kunlarda “Karsh” mahallasiga boruvchi yo‘l to‘liq qor bilan qoplanganligi sababli transportning hududga borish imkoniyati yo‘q. Viloyat hokimining ko‘rsatmasi bilan "Karsh" mahallasidagi maktabga boruvchi ichki yo‘lni taʼmirlash bo‘yicha tuman hokimligi va mutasaddi tashkilotlar tomonidan chora-tadbirlar ishlab chiqilayotgan bo‘lib, yo‘ldagi qor qoplami erigach, taʼmirlash ishlari boshlanadi”, — deyiladi izohda.
Hokimiyat qilingan ishlar borasida jamoatchilikka qo‘shimcha axborot berilishini qayd etdi.
