Navoiyda fuqaro “dom”ga o‘zi uchun alohida lift o‘rnatmoqchi bo‘ldi
Holatga Qurilish va uy-joy kommunal xo‘jaligi vazirligi rasmiy izoh berdi.
Ijtimoiy tarmoqlarda Navoiy shahri markazidagi ko‘p qavatli uylarning biriga mulkdor tomonidan lift o‘rnatilayotganligi haqida murojaati bo‘yicha, Navoiy viloyati Qurilish va uy-joy kommunal xo‘jaligi sohasida hududiy nazorat qilish inspeksiyasi tomonidan joriy yilning 29 yanvarida Navoiy shahri Navoiy ko‘chasi 39 D-sonli ko‘p kvartirali uy o‘rganildi.
Unga ko‘ra, ushbu binoning 10-qavati (pentxaus)da joylashgan 2 ta 46 va 47-xonadonlarni xarid qilgan mulkdor binoning tashqi yon fasad qismidan faqatgina o‘zi foydalanishi uchun lift qurilmasi o‘rnatilayotganligi aniqlandi.
Mulkdor inspeksiyaning lift qurilmasini o‘rnatish yuzasidan asoslantiruvchi hujjatlar bo‘yicha so‘roviga tegishli tashkilotlar tomonidan imzolangan taklif loyihasini taqdim etgan.
Mulkdorga ko‘p kvartirali uyning umumiy mulkidan foydalanish qoidalari, bunda aholi oldiga qo‘yildigan talablar tushuntirilgan va joriy yilning 29 yanvar sanasida o‘zboshimchalik bilan qurilgan qurilmani bartaraf etish bo‘yicha tegishli tartibda majburiy ko‘rsatma berilgan.
Holat yuzasidan 2024 yil 1 fevral kuni Navoiy shahar prokuraturasiga tegishli hujjatlar taqdim qilingan.
Maʼlumot o‘rnida taʼkidlash lozimki, O‘zbekiston Respublikasining “Ko‘p kvartirali uylarni boshqarish to‘g‘risida”gi Qonuniga ko‘ra ko‘p kvartirali uydagi umumiy joylar, tayanch va to‘siq konstruksiyalar, kvartiralar oralig‘idagi ihotalangan (o‘rama) pillapoyalar, zinapoyalar, liftlar, liftning shaxtalari hamda boshqa shaxtalar, dahlizlar, texnik qavatlar, yerto‘lalar, cherdaklar va tomlar, uy ichidagi muhandislik tarmoqlari hamda kommunikatsiyalari, joylarning tashqarisida yoki ichida joylashgan va bittadan ortiq joyga xizmat ko‘rsatadigan mexanik, elektr, sanitariya-texnika uskunalari va qurilmalari hamda boshqa uskuna va qurilmalar umumiy mol-mulkdir. Umumiy mol-mulk joylarning mulkdorlariga umumiy ulushli mulk huquqi asosida tegishli hisoblanadi.
